गुंगीचे औषध देऊन अत्याचार करणारा मोकाट

शीतपेयाच्या बाटलीत गुंगीचे औषध टाकून अंबरनाथ येथील एका २० वर्षीय विवाहितेवर अत्याचार करणारा विशाल पवार (२५) हा अद्यापही वर्तकनगर पोलिसांच्या हाती लागलेला नाही.

लोकमत न्यूज नेटवर्क
ठाणे : शीतपेयाच्या बाटलीत गुंगीचे औषध टाकून अंबरनाथ येथील एका २० वर्षीय विवाहितेवर अत्याचार करणारा विशाल पवार (२५) हा अद्यापही वर्तकनगर पोलिसांच्या हाती लागलेला नाही. त्याला शोधण्यासाठी एका विशेष पथकाची निर्मिती केल्याची माहिती सूत्रांनी दिली.
पीडितेचा पती आणि विशाल एकमेकांचे मित्र आहेत. तो जेथे काम करतो, त्याच मॉलमध्ये ती देखिल नोकरीला असल्याने त्यांची एकमेकांशी चांगली ओळख होती. त्याचाच गैरफायदा घेऊन त्याने तिचा विश्वास संपादन केला. यातूनच शीतपेयात गुंगीचे औषध टाकून तिच्या चिरागनगर येथील घरी त्याने लैंगिक अत्याचार केले. त्याची मोबाईलमध्ये चित्रफित करुन त्याने वर्षभरात वारंवार तिच्यावर अत्याचार केला. वर्तकनगर पोलीस ठाण्यात याप्रकरणी तक्रार दाखल झाल्यानंतर वरिष्ठ पोलीस निरीक्षक प्रदीप गिरधर यांच्या मार्गदर्शनाखाली पोलीस निरीक्षक बी. एस. तांबे, महिला उपनिरीक्षक एस. आर. अडसुळे आणि तीन कर्मचारी असे एक विशेष पथक तयार करण्यात आले आहे. त्याला लवकरच ताब्यात घेण्यात येईल, असाही दावा वर्तकनगर पोलिसांनी केला आहे.