कार्ला फाट्याजवळ ट्रक उलटला, जुन्या मुंबई - पुणे महामार्गावर वाहतूक कोंडी

लोणावळा, दि. 7 - जुन्या मुंबई - पुणे राष्ट्रीय महामार्गावर एमटीडीसी ते कार्ला फाटा दरम्यान वाहतूक कोंडी झाली आहे. 

लोखंडी पाईप घेऊन पुण्याच्या दिशेने जाणारा ट्रक रस्त्यावरच उलटल्याने या मार्गावर मोठी वाहतुक कोंडी झाली आहे. सकाळी साडेसहा वाजण्याच्या सुमारास हा अपघात झाला. अपघातग्रस्त ट्रक व पाईप हे रस्त्यावरच असल्याने पुण्याकडे जाणारा मार्ग बंद झाला आहे. सुदैवाने या अपघात जिवितहानी झाली नाही. 

 

मिळालेल्या माहितीनुसार मुंबईकडून पुण्याच्या दिशेने निघालेला ट्रक (KA 39 - 9586) हा चालकाचा ताबा सुटल्याने एमटीडीसी ते कार्ला फाटा दरम्यान असलेल्या डाक बंगला समोर रस्त्यामध्येच उलटला. यावेळी ट्रकमधील लोखंडी पाईप रस्त्यावर सर्वत्र पसरल्याने मार्ग वाहतुकीसाठी बंद झाला आहे. याच दरम्यान पुण्याहून मुंबईच्या दिशेने जाणारा एक ट्रक ( MH 40 Y 2740) हा विरुध्द बाजुला रस्त्याच्या खाली उतरला आहे. सध्या पुण्याकडे जाणारी वाहतुक मुंबई लेनवरुन एकेरी मार्गाने वळविण्यात आल्याने पुणे व मुंबई या दोन्ही मार्गावर वाहतुक कोंडी झाली आहे. घटना घडल्यानंतर तब्बल दिड तासांनी म्हणेज आठ वाजता क्रेन घटनास्थळी दाखल झाले असून अपघातग्रस्त ट्रक व लोखंडी पाईप बाजुला घेण्याचे काम सुरु असून अतिशय संथ गतीने वाहतुक सुरु आहे.