टेम्पो-कंटेनरच्या भीषण अपघातात दोघे ठार

आयशर टेम्पो व कंटेनरची समोरासमोर धडक होऊन झालेल्या अपघातात टेम्पोमधील दोघे जण जागीच ठार तर दोघे जण जखमी

ऑनलाइन लोकमत

सोलापूर, दि. 9- येथील बोरामणी नाक्यावर आयशर टेम्पो व कंटेनरची समोरासमोर धडक होऊन झालेल्या अपघातात टेम्पोमधील दोघे जण जागीच ठार तर दोघे जण जखमी झाल्याची घटना सोमवारी पहाटे दोनच्या सुमारास घडली़ जखमींना उपचारासाठी शासकीय रुग्णालयात दाखल करण्यात आले आहे़
अहमद जलाल शेख (वय २५) व आण्णा जयसिंग जावीर (वय ३०, रा़ धायटी, ता, सांगोला) असे अपघातात ठार झालेल्यांची नावे आहेत़ तर महानंदा प्रशांत मुळे (वय ३०) तर प्रथमेश प्रशांत मुळे (वय ११) ही दोघे मायलेकरं जखमी झाले आहेत़ पोलीसांनी दिलेल्या माहितीनुसार, आयशर टेम्पो (क्ऱ एमएच १३ आर ४६०३) हा मिरची घेऊन सोलापूर येथील बाजार समितीत विक्रीसाठी आणत होता़ त्याचवेळी दयानंद महाविद्यालयाकडून येणारी कंटेनर ट्रक (आरजे ०८ जीबी १६१९) ही अक्कलकोट पाण्याच्या टाकीकडे जात होता़ ही दोन्हीही वाहनं जुना बोरामणी चौकात वेगाने जात असताना दोघांची समोरासमोर धडक झाली़ या धडकेत कंटेनर ट्रक हा शेजारीच राहणाऱ्या महानंदा मुळे यांच्या घरात घुसून आजूबाजुच्या दुकानावर दोन्ही वाहने आदळली़ या अपघातात आयशर टेम्पोमधील अहमद जलाल शेख व आण्णा जयसिंग जावीर हे दोघे जागीच ठार झाले़ जखमींना शासकीय रुग्णालयात उपचारासाठी दाखल करण्यात आले़ किरकोळ उपचार करून त्यांना घरी सोडून देण्यात आले़ या घटनेची माहिती कळताच धायटी (ता़ सांगोला) येथील नागरिकांनी शासकीय रुग्णालयात गर्दी केली होती़ जखमींना उपचारासाठी पोहेकॉ व्ही़जी़भोई यांनी मदत केली़
या अपघाताची माहिती समजताच जेलरोड व जोडभावी पोलीस ठाण्याचे पालीस अधिकारी यांनी भेट दिली़ यानंतर पोलीस उपायुक्त अर्पणा गिते यांनी अपघात स्थळाला भेट देऊन जखमींची विचारपूस केली़
घराचे व दुकानांचे झाले नुकसान....
हा अपघात झाला तेव्हा पहाटेचे तीन वाजले होते़ त्यामुळे या परिसरात फारशी वर्दळ नव्हती़ मात्र आवाज ऐकून आजुबाजुचे लोक मदतीसाठी धावून आले़ शेजारी राहणाऱ्या लोकांनी जखमींना शासकीय रुग्णालयापर्यंत पोहचविले़ या झालेल्या अपघातात घर तसेच घरातील साहित्य, शेजारीत दोन दुकानांचे नुकसान झाले आहे़ नागरिकांनी अपघाताची माहिती कळताच पोलीसांना कळविले़ यानंतर पोलीसांनी घटनास्थळाला भेट देऊन पाहणी केली़