धर्मवीर २, हिंदुत्व अन् राजकारण...; संजय राऊतांनी CM एकनाथ शिंदेंना फटकारलं

गुरुपोर्णिमेनिमित्त मुख्यमंत्री एकनाथ शिंदे, उपमुख्यमंत्री देवेंद्र फडणवीस, अभिनेते जितेंद्र, सलमान खान यांच्या उपस्थितीत धर्मवीर २ सिनेमा ट्रेलर लॉन्च करण्यात आला. या सिनेमावरून राऊतांनी मुख्यमंत्र्यांवर निशाणा साधला.

मुंबई - आनंद दिघे यांना आम्ही जास्त ओळखतो. आज आनंद दिघेंवर काहीजण स्वत:ची मालकी दाखवतायेत, सिनेमा-नाटकं काढतायेत. पण आनंद दिघेंच्या मनात त्यांच्याबद्दल काय भावना आणि मते होती हे आम्हाला माहिती आहे. आम्ही जर त्यावर सिनेमे काढले तर तोंड लपवून फिरावं लागेल. आज गुरुपोर्णिमा आहे त्यामुळे बाळासाहेबांनी सांगितलंय, सत्य बोला आणि इमानानं जगा. जर बेईमान लोक आनंद दिघेंना गुरू मानून त्यांचे खोटे चित्र समोर आणत असतील तर तो आनंद दिघेंचा अपमान आहे आणि आनंद दिघे यांचे गुरू बाळासाहेब ठाकरे यांचाही अपमान आहे अशा शब्दात खासदार संजय राऊत यांनी मुख्यमंत्री एकनाथ शिंदे यांना फटकारलं आहे.

संजय राऊत म्हणाले की, आनंद दिघे यांच्या तोंडी काही वाक्य घालून तुम्ही तुमची राजकीय पोळी भाजण्याचा प्रयत्न कराल पण भविष्यात तुम्हीसुद्धा या आगीत चटके लागून संपल्याशिवाय राहणार नाही. आनंद दिघे यांचा संपूर्ण कालखंड आम्ही पाहिला आहे. दिघेंच्या नावाखाली खोट्या गोष्टी पसरवणं. आनंद दिघे यांचे हिंदुत्व हे बाळासाहेबांचे हिंदुत्व होतं ते वेगळं नव्हते. बाळासाहेबांचे हिंदुत्वच आम्ही सगळ्यांनी स्वीकारलं, ते वेगळं नव्हते. ठाण्यात हिंदुत्व वेगळं नव्हते. असा काही झालं नाही असं त्यांनी सांगितले. 

त्याचसोबत हिंदुत्वाच्या ज्या काही वेगळ्या चुली मांडल्यात त्या आनंद दिघेंनीही कधी मान्य केल्या नसत्या. हे चित्रपट बोगस आणि भंपक आहे. आपल्या खोटेपणावर पांघरून घालण्यासाठी अशाप्रकारचे चित्रपट याआधी आले आहेत. काश्मीर फाईल्स भाजपाच्या लोकांनी निर्माण केलेत. आपल्या खोट्या भूमिकांना सत्याचा मुलामा देण्यासाठी या माध्यमाचा वापर केला ते सर्व चुकीचे आहे अशी टीकाही संजय राऊतांनी धर्मवीर २ या सिनेमावर केली आहे.

दरम्यान, जे खोटे आहे त्याची चिंता आपण का करायची? पहिल्या चित्रपटात आनंद दिघेंचा महानिर्वाण दाखवला आहे मग त्यानंतर दुसरा भाग कसा येऊ शकतो. पण विधानसभा निवडणुका आहेत. खोट्याला उजाळा द्यायचा आहे. आपल्या बेईमानीवर तारे चमकवायचे आहे. त्यामुळे आनंद दिघेंसारखे महान निष्ठावान शिवसैनिकाचा, शिवसेना नेत्याचा वापर करायचा हे काम त्यांचे आहे असंही संजय राऊत यांनी म्हटलं आहे. 

धर्मवीर २ डबल यशस्वी होईल, मुख्यमंत्र्यांच्या शुभेच्छा

विचार देऊन गेलेला माणूस त्यांच्या विचारांवर चालण्याची दिशा देऊन जातो. बाळासाहेब आणि आनंद दिघेंच्या पाऊलावर पाऊल नव्हे तर जीव टाकून आम्ही काम करतोय. सिनेमाच्या माध्यमातून धगधगता भूतकाळ समोर आणलाय. पहिला सिनेमा जसा यशस्वी झाला तसा हा सिनेमा डबल यशस्वी होईल असं सांगत धर्मवीर २ सिनेमाच्या ट्रेलर लॉन्चिंगवेळी मुख्यमंत्री एकनाथ शिंदेंनी शुभेच्छा दिल्या.