स्त्री जन्माचे स्वागत करण्यासाठी अनोखा उपक्रम!

वाशिम, दि. 4 -  सावित्री-जिजाऊ दशरात्रौत्सवाला ३ जानेवारीपासून सुरूवात झाली असून,  या दरम्यान अभिनंदन पत्र व मिठाई देऊन स्त्री जन्माचे स्वागत करण्याचा उपक्रम जिल्हा प्रशासनाने हाती घेतला आहे.

पूर्वीच्या तुलनेत आता महिला बऱ्यापैकी यशाची शिखरे गाठत आहेत. मात्र, पुरूषांच्या तुलनेत स्त्री जन्मदराचे प्रमाण कमी असल्याने पुरूष-स्त्री लिंगगुणोत्तरात तफावत निर्माण होत आहे. तफावतीची ही दरी कमी करण्यासाठी केंद्र शासनाने ‘बेटी बचाओ-बेटी पढाओ’ अभियान सुरू केले असून, यामध्ये वाशिम जिल्ह्याचा समावेश आहे. स्त्री लिंगगुणोत्तराचे प्रमाण वाढविणे आणि मुलींना शिक्षणाच्या मुख्य प्रवाहात आणण्यासाठी जिल्हा प्रशासन, महिला व बालकल्याण विभाग आणि आरोग्य विभागाने स्त्री जन्माचे स्वागत करण्याचा उपक्रम सुरू केला आहे. बालिका दिनाचे औचित्य तसेच सावित्री-जिजाऊ दशरात्रौत्सवानिमित्त आरोग्य केंद्रात जाऊन स्त्री जन्माचे स्वागत, मातांचे अभिनंदन  केले जात आहे. ३ व ४ जानेवारीला जिल्हा सामान्य रुग्णालयात मान्यवरांच्या उपस्थितीत हा उपक्रम राबविण्यात आला.