पिवळं लुगडं नेसून सिंगापूरला लेकाचं ऑफिस पाहिलं; आईला ‘फॉरिन’ला नेणाऱ्या दत्तात्रयची संघर्ष यात्रा...

मी सगळ्यांना एकच सांगतो, आपलं नवीन जग, विदेश आपल्या पालकांनाही दाखवा, त्यांना होणारा आनंद मोजता नाही येणार!’

बीड जिल्ह्यातलं भोगलगाव ते सिंगापूर, शेतमजुरी ते ब्लॉकचेन हा प्रवास दत्तात्रय जाधवसाठी सोपा नव्हता. पण, तो करतानाच त्याच्या मनात होतं की, आपण जी काही प्रगती करू त्यात आपलं कुटुंब, आपली आई आपल्यासोबत हवी. तो दहावीत असतानाच वडील गेले, पण भाऊ, आई यांच्या साथीनं त्यानं आपल्या जगण्याला मेहनतीची चाकं लावली. आज ब्लॉकचेन तज्ज्ञ असलेला दत्तात्रय सिंगापूरमध्ये नोकरी करतो आणि ‘फॉरिन’ नावाचं फक्त ऐकलेलं ते जग आपल्या आईनंही पाहावं म्हणून तो आईला सिंगापूरला घेऊन गेला, त्याचसंदर्भात त्यानं लिहिलेली एक पोस्ट सोशल मीडियात व्हायरल झाली.

लिंकडीन या सोशल मीडिया प्लॅटफॉर्मवर लिहिलेल्या लहानशा पोस्टमध्ये दत्तात्रय म्हणतो, लहानशा खेड्यात आईनं आयुष्यभर कष्ट केले. तिनं कधी विमान पाहिलं नव्हतं, आता विदेशातलं लेकाचं जग, ऑफिस पाहून तिच्या नजरेत अभिमान, आनंद आहे. मी सगळ्यांना एकच सांगतो, आपलं नवीन जग, विदेश आपल्या पालकांनाही दाखवा, त्यांना होणारा आनंद मोजता नाही येणार!’

पिवळं लुगडं नेसून सिंगापूरला लेकाचं ऑफिस पाहायला गेलेली आई आणि तिचा प्रेमळ लेक अर्थात सोशल मीडियात व्हायरल झाला. दत्तात्रयशी ‘लोकमत’ने संपर्क केला तर तो म्हणाला भोगलगावातले दिवस आठवतात मला अजूनही. चार एकर जमीन, वडील-भाऊ-आई शेतमजुरी करीत, गोदावरीला पाणी नाही, पाऊस नाही. मला एकच माहिती होतं की ही परिस्थिती बदलायची तर मला मेहनत, अभ्यासच करायला हवा. बीसीएस केलं औरंगाबादला, काही क्लासेस लावले हैदराबादला आणि मला चांगली नोकरी मिळाली. पण, आईला तेव्हा हैदराबादलाही नेता आलं नाही. पण, पुढे पुण्यात नोकरीला लागलो आणि मी आईला सोबत घेऊन गेलो. पुतण्या शिकायला आला. मनात एकच होतं, सुखाचे दिवस आले तर आईसोबत हवीच. पत्नीही मला समविचारी मिळाली आणि सिंगापूरला नोकरी लागली आणि इथं स्थिरावताच मी आईला सिंगापूरला घेऊन आलाे.’

दत्तात्रय ब्लॉकचेनसह हॅकिंग विषयातला तज्ज्ञ आहे. त्यानं आजवर अनेक हॅकॅथॉन जिंकले आहेत. शेतकऱ्यांचं जगणं सुकर व्हावं म्हणून काही सॉफ्टवेअर बनविण्याचे त्याच्या मनात आहे. दत्तात्रय म्हणतो, आपली प्रगती, आपलं बदललेलं जग आणि त्याचा आनंद आई-वडिलांच्या डोळ्यांत पाहण्यासारखा आनंद नाही.