... तर बस स्टॉप व गणेश मंडळांजवळ सचिन तेंडुलकर दानपेटी ठेवू; बच्चू कडूंचा इशारा

Bacchu kadu vs Sachin Tendulkar: आमचा विरोध तेंडुलकरना नाही परंतु भारतरत्न व्यक्तीस ही बाब अशोभनीय आहे, असे म्हणत बच्चू कडूंचे तेंडूलकरच्या बंगल्यासमोर आंदोलन

ऑनलाईन गेमिंगची जाहिरात करणाऱ्या क्रिकेटपटू सचिन तेंडुलकरच्या विरोधात प्रहारचे आमदार बच्चू कडू आक्रमक झाले आहेत. एकतर सचिनने जुगाराची प्रसिद्धी करणारी जाहिरात सोडावी किंवा भारतरत्न परत करावे, अशी मागणी कडू यांनी केली आहे. यासाठी कडू यांनी आज सचिनच्या घराबाहेर आंदोलन केले. या आंदोलकांना पोलिसांनी ताब्यात घेतले आहे. 

भारतरत्न सचिन तेंडुलकर यांना वारंवार paytm first जुगाराची जाहीरात बंद करण्याची विनंती केली. परंतु अद्याप ही जाहीरात बंद झालेली नाही. आमचा विरोध तेंडुलकरना नाही परंतु भारतरत्न व्यक्तीस ही बाब अशोभनीय आहे. एकतर त्यांनी जाहीरात बंद करावी नाही तर भारतरत्न परत करावा, अशी आमची मागणी आहे असे कडू म्हणाले. 

सचिनने यापैकी काही केली नाही तर संपूर्ण महाराष्ट्रातील बस स्टॉप व गणेश मंडळांजवळ तेंडुलकर भिकपेटी व तेंडुलकर सुचना पेटी लावण्यात येणार आहे, असा इशारा कडू यांनी दिला आहे. ऑनलाईन गेमिंगची तुम्ही जर जाहीरात करताय, तर मग मटक्याचीही करा, ते कशाला सोडताय? भारतरत्न असल्यामुळे आम्ही आंदोलन करत आहे. ते फक्त क्रिकेटर असते तर आम्ही आंदोलन केलं नसतं. ज्यांना भारतरत्न मिळाला ते जर गैरफायदा घेत आहेत, असा आरोप कडू यांनी केला आहे. 

सचिन तेंडुलकरचे भरपूर चाहते आहेत. त्यामुळे त्यांनी केलेल्या जाहीरातीचा परिणाम लहान मुलांपासून सगळ्यांवर होत आहे. येणाऱ्या गणेशोत्सवात आम्ही प्रत्येक गणेशमंडळात दानपेटी ठेवणार आहोत. 10 दिवस ही दानपेटी गणेशमंडळात ठेवणार. त्यानंतर त्या सर्व दानपेट्यांमधील रक्कम एकत्र करुन सचिन तेंडुलकरांना देणार आहे, असे कडू म्हणाले.