महिलेवर हल्ला करून मंगळसूत्र नेले हिसकावून

रात्रीच्या वेळी एका आरोपीने महिलेच्या डोळ्यात तिखट फेकून तिचे मंगळसूत्र हिसकावून घेतले.

ऑनलाइन लोकमत
नागपूर, दि. 15 - रात्रीच्या वेळी एका आरोपीने महिलेच्या डोळ्यात तिखट फेकून तिचे मंगळसूत्र हिसकावून घेतले. नंतर त्या महिलेल्या तिच्याच घरात बंद करून आरोपी पळून गेल्याची खळबळजनक घटना गुरुवारी रात्री मनिषनगरात घडली. या घटनेत उज्ज्वला उमाकांत फिरंगे (वय ४८) या महिलेच्या डोळ्याला जबर दुखापत झाली आहे.
फिरंगे सोनेगावच्या शिल्पा सोसायटीतील सनराज पॅलेसमध्ये राहतात. सोमवारी रात्री त्या आपल्या घरात बसून होत्या. रात्री ७.१५ वाजता त्यांचे दार वाजले. पती कामावरून परतले असावे, असे समजून त्यांनी दार उघडले. त्याचवेळी दारात उभा असलेल्या आरोपीने फिरंगेच्या डोळ्यात मिरची पावडर फेकली. त्यानंतर त्यांच्या गळ्यातील मंगळसूत्र हिसकावून घेतले. फिरंगे यांना घरात ढकलून बाहेरून दाराची कडी लावून आरोपी पळून गेला.
या घटनेमुळे प्रचंड दहशतीत आलेल्या फिरंगे यांनी आरडाओरड केली. त्यामुळे शेजारची मंडळी त्यांच्या दारासमोर गोळा झाली. त्यांनी बाहेरून दाराची कडी उघडली. त्यानंतर फिरंगे यांना शेजा-यांनी दिलासा देत काय झाले त्याबाबत विचारणा केली. काही वेळेनंतर त्यांचे पती घरी परतले. त्यांनी सोनेगाव पोलिसांना कळविले. फिरंगे यांच्या तक्रारीनुसार, सोनेगाव पोलिसांनी आरोपीविरुद्ध जबरी चोरीचा गुन्हा दाखल केला. आरोपी २५ ते ३० वयोगटातील होता. त्याने काळा पॅन्ट, काळे शर्ट घातले होते आणि त्याच्या हातात हेल्मेट होते.
महिलांमध्ये दहशत
शहरात दागिने हिसकावून नेण्याच्या घटना नेहमीच घडतात. मात्र, कुणी दारात येऊन हल्ला करून मंगळसूत्र हिसकावून नेण्याची अशा प्रकारची ही अलिकडच्या काळातील पहिलीच घटना आहे. त्यामुळे महिलांमध्ये प्रचंड दहशत निर्माण झाली आहे.