तुम्हाला हव्या असलेल्या मुख्यमंत्र्यांसाठी कामाला लागा, बावनकुळेंनी म्हणताच फडणवीसांच्या नावाची...

मेदवार कोणी जरी असला तरी प्रत्येक जागेची जबाबदारी ही भाजपचीच असेल, असे मतही बावनकुळे यांनी पत्रकारांशी बोलताना व्यक्त केले. राज्यातून ४५ खासदार ५१ टक्के मते घेऊन मोदी यांना तिसऱ्यांदा पंतप्रधान करतील. 

लोकमत न्यूज नेटवर्क
ठाणे : तुम्हाला मुख्यमंत्री म्हणून कोण हवे आहे, असा सवाल भाजपचे प्रदेशाध्यक्ष चंद्रशेखर बावनकुळे यांनी गडकरी रंगायतनमध्ये जमलेल्या शेकडो कार्यकर्त्यांना करताच एकमुखाने देवेंद्र फडणवीस...देवेंद्र फडणवीस, असा घोष कार्यकर्त्यांनी केला. लागलीच  तुम्हाला हव्या असलेल्या मुख्यमंत्र्यांसाठी कामाला लागा, असा सूचक सल्ला बावनकुळे यांनी कार्यकर्त्यांना दिला. बावनकुळे यांच्या या वक्तव्यावर कार्यकर्त्यांनी टाळ्यांचा कडकडाट केला.

‘भाजपच्या महाविजय २०२४’ अभियानांतर्गत बावनकुळे मंगळवारी ठाण्यात आले होते. रंगायतन येथे त्यांनी ६०० वॉरीअर्सना मार्गदर्शन केले. यात ठाणे, ओवळा-माजिवडा, कळवा-मुंब्रा आणि कोपरी-पाचपाखाडी विधानसभा मतदारसंघातील पदाधिकारी उपस्थित होते. २०२४ मध्ये तुम्हाला मुख्यमंत्रिपदी कोण हवंय? असे त्यांनी विचारताच ‘देवेंद्र फडणवीस’ यांचे नाव कार्यकर्त्यांनी एकमुखाने घेतले.  त्यावर मला नीट आवाज ऐकू येत नसून जोरात बोला, असे बावनकुळे म्हणाले. यानंतर कार्यकर्त्यांनी पुन्हा ‘देवेंद्र फडणवीस’ यांच्या नावाचा घोष करताच तुम्हाला हव्या असलेल्या मुख्यमंत्र्याकरिता कामाला लागा, असे सूचक विधान केले.

पदाधिकाऱ्यांची घेतली हजेरी
ज्या ज्या पदाधिकाऱ्यांवर जबाबदारी टाकण्यात आली होती, त्यांना बोलावून सरल ॲपविषयी माहिती आहे का? आज त्यावर काय अपडेट आली आहे, आदी प्रश्न त्यांनी केले. अनेकांना त्याची उत्तरे देता आली नाही, त्यावरून त्यांनी नाराजी तर व्यक्त केलीच शिवाय पदाधिकाऱ्यांची कानउघाडणीही केली. जो बूथ लेव्हलला काम करीत आहे, त्याचा फोटो बॅनरवर नसतो. परंतु, बॅनर लावताना बूथ लेव्हलच्या पदाधिकाऱ्यांचा मोठा फोटो लावा व नेत्यांचे छोटे फोटो लावा, अशी सूचनाही त्यांनी केली. 
मी २० मिनिटे भाषण करणार आहे, ते शांततेत ऐका, अन्यथा बाहेर जाऊन गप्पा मारा, अशा शब्दांत त्यांनी काही पदाधिकाऱ्यांनाही सुनावले.

‘इतर समाजाच्या आरक्षणाला धक्का लागणार नाही’
मराठा समाजाला आरक्षण मिळावे, ही सर्व पक्षांची इच्छा आहे. यापूर्वीच मराठा समाजाला आरक्षण मिळाले असते. मात्र, उद्धव ठाकरेंच्या चुकांमुळे आरक्षण मिळाले नाही. मराठा समाजाला आरक्षण मिळावे. परंतु, ते देताना इतरांच्या आरक्षणाला कुठेही धक्का लागू देणार नाही, असेही त्यांनी स्पष्ट केले.

प्रत्येक जागेची जबाबदारी भाजपची!
कोण, कुठे उभा राहणार, कोणती जागा कोणाला मिळणार, याचा निर्णय केंद्रीय पार्लमेंटरी कमिटी, राज्यातील महायुतीचे तीन नेते आणि इतर घटक पक्षातील महत्त्वाचे नेते घेतील. आमच्यात कुठेही मतभेद नाहीत किंवा मनभेदही नाहीत, उमेदवार कोणी जरी असला तरी प्रत्येक जागेची जबाबदारी ही भाजपचीच असेल, असे मतही बावनकुळे यांनी पत्रकारांशी बोलताना व्यक्त केले. राज्यातून ४५ खासदार ५१ टक्के मते घेऊन मोदी यांना तिसऱ्यांदा पंतप्रधान करतील.