एकतर्फी प्रेमातून तरुणाने केले महिलेवर ब्लेडने वार

पुणे, दि. 04 - एकतर्फी प्रेमामधून दारुच्या नशेमध्ये घरामध्ये आलेल्या तरुणाने मुलीच्या आईकडे चहा आणि पाणी मागत तिच्या गळ्यावर ब्लेडने वार केल्याची घटना बुधवारी रात्री घडली. याप्रकरणी कोथरुड पोलिसांनी गुन्हा दाखल केला असून आरोपीला अटक केली आहे. दोन दिवसांनंतर ही घटना उघडकीस आली आहे. जखमी महिलेवर खासगी रुग्णालयात उपचार सुरु आहेत. 

अक्षय काशिनाथ धनवे (वय १९, रा. किष्किंदानगर, कोथरुड) असे अटक आरोपीचे नाव आहे. याप्रकरणी ४२ वर्षीय महिलेने फिर्याद दिली आहे. पोलिसांनी दिलेल्या माहितीनुसार, हल्ला झालेल्या महिलेचा फुले आणि हार विक्रीचा व्यवसाय आहे. त्या पती, मुलगा आणि मुलीसह राहण्यास आहेत. तर त्यांच्या जवळच राहणारा आरोपी धनवे हा फुलांचे गुच्छ विक्रीचा व्यवसाय करतो. आरोपी या महिलेच्या मुलीवर एकतर्फी प्रेम करतो. 

बुधवारी रात्री ही महिला आणि त्यांची मुलगी घरामध्ये हार विणत बसलेल्या होत्या. त्यावेळी धनवे दारुच्या नशेमध्ये त्यांच्या घरी गेला. त्यांची विचारपूस करीत ख्यालीखुशाली विचारली. 

त्यांनी त्याला घरामध्ये बोलावून बसायला सांगितले. त्याने पिण्यासाठी चहा मागितला. परंतु तो दारु प्यायलेला असल्यामुळे मुलीने घरामध्ये दुध शिल्लक नसल्याचे सांगितले. तेव्हा त्याने कोरा चहा दिला तरी चालेल असे म्हटल्यावर चहा बनविण्यासाठी ही महिला स्वयंपाकघरामध्ये गेल्या. तेव्हा आरोपीही त्यांच्या मागोमाग स्वयंपाकघरामध्ये गेला. त्याने पिण्यासाठी पाणी मागितले. पाणी दिल्यानंतर गॅसवर चहा ठेवत असतानाच त्याने हातामधील ब्लेडने या महिलेच्या गळ्यावर दोनदा वार केले. काही कळायच्याआतच धनवे तेथून पसार झाला. 

त्यांनी आरडाओरडा करायला सुरुवात करताच मुलगी आतमध्ये धावली. आईने सांगितल्याप्रमाणे तिने मोठ्या भावाला फोन करुन बोलावून घेतले. धावत आलेल्या मुलाने त्यांना उचलून बाहेर नेत आॅटोरिक्षाने रुग्णालयामध्ये नेले. तेथे त्यांना दाखल करुन उपचार सुरु करण्यात आले. त्याने महिलेच्या मुलीवर असलेले एकतर्फी प्रेम हे या हल्ल्यामागील असल्याचे तपासात समोर आले आहे. आरोपीने पोलिसांना दिलेल्या जबाबात ही बाब मान्य केली आहे. त्याला तात्काळ अटक करण्यात आली आहे.