१०.१७ लाखांचा मुद्देमाल जप्त

लाेकमत न्यूज नेटवर्क

खापरखेडा/बेला : खापरखेडा (ता. सावनेर) आणि बेला (ता. उमरेड) पाेलिसांनी केलेल्या दाेन वेगवेगळ्या कारवाईमध्ये रेतीची विनाराॅयल्टी वाहतूक करणारा ट्रक व ट्रॅक्टर पकडला. यात वाहन चालकांवर गुन्हा नाेंदविण्यात आला असून, त्यांच्याकडून एकूण १० लाख १७ हजार रुपये किमतीचा मुद्देमाल जप्त केला. या दाेन्ही कारवाई शनिवारी करण्यात आल्या.

खापरखेडा पाेलिसांचे पथक गस्तीवर असताना, त्यांना वलनी (ता.सावनेर) शिवारातून रेतीची वाहतूक केली जात असल्याची माहिती मिळाली हाेती. त्यामुळे त्यांनी या भागाची पाहणी केली, तेव्हा त्यांना एमएच-४०/बीएफ-७२१७ क्रमांकाचा ट्रक येताना दिसला. त्यांनी हा ट्रक थांबवून झडती घेतली असता, त्यात त्यांना रेती असल्याचे आढळून आले. कागदपत्रांच्या तपासणीअंती ती रेतीची विनाराॅयल्टी वाहतूक असल्याचे स्पष्ट झाले. त्यामुळे पाेलिसांनी ट्रकचालक माेसीन हसन शेख, रा.जगदीशनगर, काटाेल राेड, नागपूर याच्याविरुद्ध गुन्हा नाेंदविला, शिवाय त्याच्याकडून सहा लाख रुपयांचा ट्रक आणि १२ हजार रुपयांची सहा ब्रास रेती असा एकूण ६ लाख १२ हजार रुपये किमतीचा मुद्देमाल जप्त केला.

दुसरी कारवाई बेला पाेलिसांनी गस्तीदरम्यान सिर्सी (ता. उमरेड) शिवारात शनिवारी केली. पाेलिसांचे पथक सिर्सी शहरातून जात असताना त्यांना एमएच-३४/एल-३९२३ क्रमांकाचा ट्रॅक्टर जाताना दिसला. संशय आल्याने पाेलिसांनी हा ट्रॅक्टर थांबवून झडती घेतली. त्या ट्रॅक्टरच्या ट्राॅलीत रेती आढळून येताच पाेलिसांनी कागदपत्रांची तपासणी केली. ती रेती विनाराॅयल्टी असल्याचे चाैकशीत स्पष्ट झाल्याने पाेलिसांनी ट्रॅक्टर चालक मुकेश आनंदराव लेंडे, रा. सिर्सी, ता. उमरेड याच्याविरुद्ध गुन्हा नाेंदविला. त्याच्याकडून चार लाख रुपयांचा ट्रॅक्टर व पाच हजार रुपयांची एक ब्रास रेती असा एकूण ४ लाख ५ हजार रुपये किमतीचा मुद्देमाल जप्त केला.

या दाेन्ही प्रकरणात खापरखेडा व बेला पाेलिसांनी ट्रक व ट्रॅक्टर चालकांसह मालकांवर भादंवि ३७९ अन्वये गुन्हा नाेंदविला आहे. या घटनांचा पुढील तपास अनुक्रमे पाेलीस उपनिरीक्षक अंधारे व पाेलीस हवालदार अशाेक जाधव करीत आहेत.