हिंगणघाटच्या व्यक्तीकडून १.९१ किलो गांजा जप्त

एनडीपीएस कायद्यांतर्गत गुन्हा दाखल

नागपूर : वर्धा जिल्ह्यातील हिंगणघाट येथील एका व्यक्तीकडून पोलिसांनी १.९१ किलो गांजा जप्त केला आहे. गुन्हे शाखेच्या अंमली पदार्थ विरोधी पथकाने ही कारवाई केली.

मंगळवारी मध्यरात्री सव्वा वाजताच्या सुमारास ही कारवाई करण्यात आली. एक व्यक्ती अंमली पदार्थ घेऊन येणार असल्याची माहिती पोलिसांना खबऱ्यांकडून मिळाली. पोलिसांनी सापळा रचला व गणेशपेठ येथील एसटी महामंडळ क्वॉर्टर समोरील मुख्य रस्त्यावर एका इसमाला ताब्यात घेतले. शाहबाज अली सय्यद अहमद अली (२९, हिंगणघाट, वर्धा) असे त्याने स्वत: चे नाव सांगितले. त्याची झडती घेतली असता त्याच्याजवळील पिशवीतून १.९११ किलो गांजा आढळला. त्याची किंमत जवळपास २९ हजार इतकी होती. त्याच्याविरोधात एनडीपीएस कायद्यांतर्गत गुन्हा दाखल करण्यात आला असून त्याला अटक करण्यात आली आहे.