भाजपचे ३३४ मतदार सहलीला, काँग्रेसच्या हाती कुणी लागेना!

काँग्रेस नेत्यांकडून घोडेबाजार करण्याचे प्रयत्न सुरू झाले होते. आपल्या मतदारांना प्रलोभने दिली जात आहेत, असा दावा करत भाजपने आपले ३३४ मतदार सहलीला पाठवले आहेत. हे सर्व मतदार ९ डिसेंबरच्या रात्री परततील.

ठळक मुद्देबावनकुळेंनी सोडला सुटकेचा श्वास काँग्रेस म्हणते, निकाल फिरणारच

नागपूर : विधानपरिषदेच्या निवडणुकीत भाजपला टक्कर देण्यासाठी काँग्रेसने भाजप-संघ परिवारातील उमेदवार घेतला. काँग्रेसच्या या चालीपासून सावध भूमिका घेत भाजपने लागलीच आपले मतदार एकत्र केले. सूत्रांनी दिलेल्या माहितीनुसार, भाजपने आपल्या ३३४ मतदारांना पर्यटनाला पाठवून सुटकेचा श्वास सोडला आहे.

भाजपकडून माजी मंत्री चंद्रशेखर बावनकुळे यांच्याविरोधात काँग्रेसने रवींद्र भोयर यांना रिंगणात उतरवले आहे. अपक्ष मंगेश देशमुख यांनीही माघार घेतलेली नाही. भाजपचे संख्याबळ जास्त असले, तरी आपले मतदार फुटू नयेत म्हणून अधिक काळजी घेतली जात आहे.

काँग्रेस नेत्यांकडून घोडेबाजार करण्याचे प्रयत्न सुरू झाले होते. आपल्या मतदारांना प्रलोभने दिली जात आहेत, असा दावा करत भाजपने आपले ३३४ मतदार सहलीला पाठवले आहेत. हे सर्व मतदार ९ डिसेंबरच्या रात्री परततील. विजयासाठी २५६ मतांची आवश्यकता आहे. बहुमतासाठी लागणाऱ्या आकड्यापेक्षा जास्त मतदार आधीच पर्यटनासाठी रवाना केल्यामुळे बावनकुळे यांनी सुटकेचा श्वास सोडला आहे.

महाविकास आघाडीची भिस्त पालकमंत्री नितीन राऊत व क्रीडामंत्री सुनील केदार यांच्यावर आहे. काँग्रेस नेत्यांकडून महाविकास आघाडीच्या मतदारांसह बसपा, अपक्ष व इतर मतदारांना संपर्क साधला जात आहे. भाजपमध्ये अंतर्गत खदखद आहे. आपले मतदार नाराजीतून फुटतील, या भीतीने भाजपने मतदारांना पर्यटनासाठी नेले आहे. मात्र, निकालानंतर चित्र बदललेले दिसेल, असा दावा काँग्रेस नेत्यांनी केला आहे. केंद्रीय मंत्री नितीन गडकरी, माजी मुख्यमंत्री देवेंद्र फडणवीस यांनी ही निवडणूक मनावर घेतली असताना, ३३४ मतदार एकत्र करून रवाना केले असताना त्यातील एक मोठा गट फुटेल का, हा प्रश्नच आहे.

भाजप नगरसेवक सहकुटुंब रवाना

भाजपच्या नगरसेवकांसोबत त्यांचे कुटुंबीयही पिकनिकसाठी रवाना झाले. रविवारी रात्री भाजपचे काही नगरसेवक गोवा व महाबळेश्वरच्या पिकनिकसाठी रवाना झाले. तर सोमवारी पुन्हा नगरसेवकाचे तीन गट रवाना झाले. आमदार कृष्णा खोपडे यांच्यासोबत नगरसेवकांचे एक पथक उज्जैनकडे बसने रवाना झाले. तेथून ते अहमदाबाद जाणार आहेत. रात्री ८.३० वाजता नगरसेवकांचा एक गट कर्नाटकसाठी रवाना झाला. कर्नाटकात नियम कडक केल्याने तेथील बंगळूरू विमानतळावर उतरून दिल्लीला रवाना होणार आहे. रात्री ११.३० वाजता एक गट जम्मू व उत्तराखंडसाठी रवाना झाला. 

परतल्यानंतर पेंच रिसोर्टमध्ये व्यवस्था

भाजपचे मतदार ८ डिसेंबर रोजी परत येणार आहेत. पिकनिकवरून परतल्यानंतर नगरसेवकांच्या कुटुंबीयांना घरी सोडण्यात येईल. तर संपूर्ण नगरसेवक पेंचमध्ये एका रिसोर्टवर थांबतील. तेथून सरळ मतदानाच्या दिवशी मतदान केंद्रावर आणले जाईल.