छोट्या बहिणीसमोर ९ वर्षाच्या मुलीवर बलात्कार, गप्प राहण्यासाठी दिले 20 रुपये

Nagpur Crime news : नागपूरमध्ये एक हादरवून टाकणारी घटना घडली आहे. पाच वर्षाच्या छोट्या बहिणीसोबत घरात असलेल्या ९ वर्षाच्या चिमुकलीवर एका नराधमाने बलात्कार केला. याबद्दल कुणालाही न सांगण्यासाठी त्याने २० रुपये दिले. 

Nagpur News : आईवडील कामावर गेलेले असताना छोट्या बहिणीसह घरात असलेल्या एका ९ वर्षाच्या चिमुकलीवर एका नराधमाने बलात्कार केल्याची संतापजनक घटना घडली आहे. पीडितेच्या छोट्या बहिणीसमोर ही घटना घडली. आईवडील कामावरून घरी आल्यानंतर हा प्रकार समोर आला. या घटनेबद्दल कुणालाही न सांगण्यासाठी आरोपीने पीडितेला २० रुपये दिले होते. पोलिसांनी मुलींनी वर्णन केल्याप्रमाणे रेखाचित्र तयार केले असून, आरोपीचा शोध घेत आहेत. 

९ वर्षाच्या मुलीवर घरात घुसून अत्याचार करण्यात आल्याच्या घटनेने नागपूर हादरले. ही घटना रविवारी सायंकाळी चार वाजता शहरातील पारडी भागात घडली. मुलीचे आईवडील मजुरी करतात. तर दोन्ही मुली घरीच राहत होत्या. ते कामावर गेलेले असताना आरोपी घरी आला होता. 

घरात घुसला अन् अत्याचार केला

पीडित मुलीने दिलेल्या माहितीनुसार, पीडित मुलगी तिच्या लहान बहिणीसोबत घरात होती. त्यावेळी एक ३५-४० वर्ष वय असलेला आरोपी दुचाकीवरून घरी आला. त्यांनी बाहेरून आवाज दिला आणि वडिलांबद्दल चौकशी केली. वडिलांच्या नावाने आवाज दिला. 

घरात दोन्ही मुलीच असल्याचे लक्षात आल्यानंतर आरोपी घरात घुसला. त्यानंतर त्याने ९ वर्षाच्या मुलीवर तिच्या छोट्या बहिणीसमोरच अत्याचार केला. त्यानंतर या घटनेबद्दल कुणालाही काहीही न सांगण्यासाठी पीडितेला २० रुपये दिले आणि फरार झाला. 

मुलीने आईवडिलांना सांगितली घटना

आईवडील कामावरून घरी परतल्यानंतर दोन्ही मुलींनी झालेला प्रकार सांगितला. त्यानंतर पालकांनी मुलीसह पारडी पोलीस ठाण्यात जाऊन याची तक्रार केली. वैद्यकीय चाचणीत मुलीवर अत्याचार झाल्याचे आढळून आले. पोक्सो अंतर्गत गुन्हा दाखल करण्यात आला आहे. मुलीच्या सांगण्यावरून एक रेखाचित्र तयार करण्यात आले असून, आरोपींचा शोध घेत आहे.