वर्षभरात निर्यातीमध्ये ९९ टक्क्यांनी घट; नागपूर विभागातील चित्र

Nagpur News दळणवळणाच्या दृष्टीने नागपूर हे देशातील महत्त्वाचे स्थान मानण्यात येते. मात्र, वर्षभरात आयातीप्रमाणेच निर्यातीचे प्रमाणदेखील प्रचंड घटले आहे.

ठळक मुद्देमहसुलाचा आकडा सव्वापाचशे कोटींनी घटला

लोकमत न्यूज नेटवर्क 

नागपूर : दळणवळणाच्या दृष्टीने नागपूर हे देशातील महत्त्वाचे स्थान मानण्यात येते. मात्र, वर्षभरात आयातीप्रमाणेच निर्यातीचे प्रमाणदेखील प्रचंड घटले आहे. ‘कस्टम्स’च्या सहायक आयुक्त कार्यालयांतर्गत येणाऱ्या ‘आयसीडी’ अजनीतील (इनलॅन्ड कंटेनर डेपो) आकडेवारीनुसार २०१९-२० च्या तुलनेत २०२०-२१ मध्ये नागपूर विभागातील निर्यातीमध्ये ९९ टक्क्यांनी अधिक घट झाली. तर ‘आयसीडी’ला मिळणाऱ्या महसुलाचा आकडादेखील साडेपाचशे कोटींहून अधिकने घटला आहे. (99% decline in exports during the year; Picture of Nagpur division)

उपराजधानीतील माहिती अधिकार कार्यकर्ते अभय कोलारकर यांनी माहितीच्या अधिकारांतर्गत ‘कस्टम्स’च्या सहायक आयुक्त कार्यालयाकडे विचारणा केली होती. २०१६-१७ पासून नागपूर विभागात किती कंटेनर्समधून आयात व निर्यात झाली, त्यातून किती महसूल प्राप्त झाला व एकूण किती निधीची आयात-निर्यात होती, असे प्रश्न त्यांनी उपस्थित केले होते. ‘आयसीडी’ अजनीतर्फे प्राप्त झालेल्या अधिकृत माहितीनुसार २०१७-१८ मध्ये ४ हजार १९५ कोटी २४ लाख रुपयांच्या मालाची निर्यात झाली होती. त्यानंतर सातत्याने हा आकडा कमी होत गेला. २०१९-२० मध्ये निर्यात झालेल्या वस्तूंच्या किमतीचा आकडा हा ३ हजार ४१२ कोटी १९ लाख इतका होता. २०२०-२१ मध्ये यात प्रचंड घट झाली व केवळ ३६ कोटी ५३ लाखांच्या मालाची निर्यात झाली.

दुसरीकडे २०१९-२० मध्ये २ हजार ५३६ कोटी ४० लाखांच्या वस्तू आयात झाल्या होत्या. २०२०-२१ मध्ये हाच आकडा अवघा ३५ कोटी ४४ लाख इतका होता.

याशिवाय महसुलातदेखील मोठी घट झाली. २०१९-२० मध्ये जो महसूल ५३१ कोटी ३१ लाख इतका होता तो २०२०-२१ मध्ये ६ कोटी ९८ लाख इतक्यावर पोहोचला.