मालवाहू वाहनाची दुचाकीला धडक; अपघातात तीन मित्रांपैकी एकाने घेतला जगाचा निरोप

दोन मित्र गंभीर जखमी

नागपूर : अज्ञात मालवाहू वाहनाने धडक दिल्यामुळे ट्रीपल सीट जात असलेल्या तीन मित्रांपैकी एकाचा मृत्यू झाला, तर दोघे गंभीर जखमी झाले. ही घटना कळमना पोलिस ठाण्याच्या हद्दीत रविवारी रात्री ८.३० वाजताच्या दरम्यान घडली.
संजुकुमार किसनलाल कोमलवार (वय २०) असे अपघातात मृत्यू झालेल्या युवकाचे नाव आहे.

फिर्यादी संजु ज्ञानिक वंजारे (वय १८) आणि करण रामप्रसाद पिचोरे (वय २१) अशी गंभीर जखमी झालेल्या मित्रांची नावे आहेत. तीघेही झेंडा चौक विजयनगर येथे राहतात. घटनेच्या वेळी तिघे करणची दुचाकी क्रमांक एम. एच. ४९, सी. ए-६०३४ वर बसून कृषी उत्पन्न बाजार समिती, गेट नं. २, कळमना येथून जात होते. यावेळी अज्ञात चार चाकी मालवाहक वाहनाच्या चालकाने त्याच्या ताब्यातील वाहन भरधाव वेगाने व निष्काळजीपणे चालवून त्यांच्या दुचाकीला जोरदार धडक दिली. घटनेनंतर वाहनचालक फरार झाला.

जखमींना उपचारासाठी मेयो रुग्णालयात नेले असता डॉक्टरांनी संजुकुमार कोमलवार यास मृत घोषित केले. संजु वंजारे याच्यावर उपचार सुरु असून करनच्या नातेवाईकांनी त्यास खासगी रुग्णालयात दाखल केले आहे. या प्रकरणी कळमना ठाण्याचे उपनिरीक्षक विवेक झिंगरे यांनी अज्ञात वाहनचालकाविरुद्ध कलम ३०४ (अ), २७९, ३३७, ३३८, सहकलम १३४, १७७ नुसार गुन्हा दाखल करून त्याचा शोध सुरु केला आहे.