आयटी कंपनीतील प्रोजेक्ट मॅनेजरचा कारच्या धडकेत मृत्यू

Nagpur News आयटी कंपनीतील प्रोजेक्ट मॅनेजरचा एका भरधाव कारच्या धडकेत बुधवारी सकाळी मृत्यू झाला. ऐन अभियंता दिवसाच्या अगोदर झालेल्या या घटनेमुळे हळहळ व्यक्त करण्यात येत आहे.

नागपूर : आयटी कंपनीतील प्रोजेक्ट मॅनेजरचा एका भरधाव कारच्या धडकेत बुधवारी सकाळी मृत्यू झाला. ऐन अभियंता दिवसाच्या अगोदर झालेल्या या घटनेमुळे हळहळ व्यक्त करण्यात येत आहे. अंबाझरी पोलीस ठाण्याच्या हद्दीत ही घटना घडली.

श्रीराम अनिल भडंग (३८, प्रियदर्शनीनगर, सिव्हिल लाईन्स) असे मृतकाचे नाव असून, ते आयटी पार्कमध्ये कार्यरत होते. बुधवारी सकाळी आयटी पार्कमधील कार्यालयात जाण्यासाठी घरातून निघाले. सकाळी १० वाजेच्या सुमारास मोटारसायकल क्रमांक एमएच ३१ डीई ६०२० ने हिल रोडसमोरील सिमेंट मार्गावरून जात असताना त्यांना पांढऱ्या रंगाच्या एमएच ३१ एफई २०७३ या कारने जोरदार धडक दिली. कार वेगात असल्याने श्रीराम जोरात आपटले व गंभीर जखमी झाले. काही वेळातच त्यांचा मृत्यू झाला. वैभव विनोद मंगळुरकर (२४, प्रसादनगर) हा ही कार चालवत होता. त्याच्या निष्काळजीपणामुळे अपघात झाल्याची माहिती प्रत्यक्षदर्शींनी दिली. श्रीराम यांचे वडील अनिल यांच्या तक्रारीवरून पोलिसांनी वैभवविरोधात गुन्हा नोंदविला आहे.