नागपुरात युनिसेक्स सलूनच्या आड देहव्यापाराचा अड्डा

वर्धमान नगर मार्गावरील इंद्रा हनी टॉवरमधील द सलुनवाला युनिसेक्स सलून ॲकेडमी येथे देहव्यापार सुरू असल्याची पोलिसांना माहिती मिळाली.

नागपूर : युनिसेक्स सलूनच्या आड सुरू असलेल्या देहव्यापाऱ्याच्या अड्ड्याचा नागपूर पोलिसांनी भंडाफोड केला आहे. गुन्हे शाखेच्या सामाजिक सुरक्षा विभागाच्या पथकाने लकडगंज पोलीस ठाण्याच्या हद्दीत ही कारवाई केली.

वर्धमान नगर मार्गावरील इंद्रा हनी टॉवरमधील द सलुनवाला युनिसेक्स सलून ॲकेडमी येथे देहव्यापार सुरू असल्याची पोलिसांना माहिती मिळाली. पोलिसांनी या माहितीची खातरजमा केली व मंगळवारी सायंकाळच्या सुमारास तेथे धाड टाकली. तेथे प्रिती नावाची महिला काही तरुणींकडून देहव्यापार करवून घेत असल्याची बाब समोर आली. तेथून चार पिडीत तरुणी व महिलांची सुटका करण्यात आली. गरीब कुटुंबातील महिलांना पैशांचे आमिष दाखवून प्रिती त्यांच्याकडून देहव्यापार करवून घेत होती. तिच्याकडून ९० हजारांचा मुद्देमाल पोलिसांनी जप्त केला. लकडगंज पोलीस ठाण्यात तिच्याविरोधात पिटाअंतर्गत गुन्हा दाखल करण्यात आला आहे. पोलीस निरीक्षक कविता ईसारकर, सचिन बडिये, प्रकाश माथनकर, लक्ष्मण चवरे, लता गवई, आरती चव्हाण यांच्या पथकाने ही कारवाई केली.