सदर उड्डाणपुलावर अपघात, दोन मित्रांचा मृत्यू

रात्री वाकीला फिरायला जाण्याचा अतिउत्साह भोवला

नागपूर : सदर उड्डाणपुलावर झालेल्या अपघातात दोन दुचाकीस्वारांचा मृत्यू झाल्याची घटना ताजीच असताना आणखी एका अपघातात दोघांचा बळी गेला आहे. दुचाकीवरून जाणाऱ्या दोन मित्रांना अज्ञात वाहनाने धडक दिली व त्यात त्यांचा मृत्यू झाला. चौकशीदरम्यान दोन्ही तरुण अतिवेगाने दुचाकी चालवत रात्री वाकी येथे फिरायला निघाल्याची बाब समोर आली. मानकापूर पोलिस ठाण्याच्या हद्दीत ही घटना घडली.

मूळचा यवतमाळमधील उमरखेड येथील ज्ञानेश्वर रमेश वासमवार (२१, सोमवारी क्वॉर्टर) व नचिकेत सूरज राऊत (२४, राणी भोसलेनगर, सक्करदरा), असे मृतक मित्रांचे नाव आहे. मंगळवारी रात्री पाच मित्र एकत्रित बसले व त्यांनी मद्य प्राशन केले. त्यानंतर त्यांनी मोमीनपुरा येथे पोहे खाल्ले व दीड वाजेच्या सुमारास पाचही जण दोन दुचाकींनी फिरायला निघाले.

कोराडी तलावाजवळ पोहोचल्यावर त्यांनी परत जाण्याचे ठरविले व ते उड्डाणपुलावरून ताजबागच्या दिशेने निघाले. त्यांच्यासोबत आणखी एका दुचाकीवर त्यांचे मित्र हेमंत मांझी (२१, छोटा ताजबाग), मयूर श्रीवास व अभिषेक लोखंडे हेदेखील होते. उड्डाणपुलावर पागलखाना चौकाजवळ आले असता नचिकेतने वेगाने दुचाकी चालविली व तो हेमंतच्या दुचाकीच्या समोर निघून गेला. कल्पना टॉकीजच्या चौकातून सदर उड्डाणपुलावर चढत असताना अज्ञात वाहनाने नचिकेतच्या दुचाकीला धडक दिली. त्यात ते दोघेही गंभीर जखमी झाले. त्यांना मेयो इस्पितळात नेण्यात आले. मात्र, उपचारादरम्यान त्यांचा मृत्यू झाला. मानकापूर पोलिस ठाण्यात अज्ञात आरोपीविरोधात गुन्हा दाखल करण्यात आला आहे.