तरुण शेतकऱ्याचा अपघाती मृत्यू

रामटेक : शेताकडून घराकडे परत चाललेल्या शेतकऱ्यास अज्ञात वाहनाने धडक दिल्याने त्याचा जागीच मृत्यू झाला. विजय सुंदरलाल शरणागत (३२) असे मृत शेतकऱ्याचे नाव आहे. रामटेक तालुक्यातील डोंगरी येथे मंगळवारी सायंकाळी ५.३० वाजताच्या सुमारास ही घटना घडली.

मिळालेल्या माहितीनुसार, विजय हा शेतातील कामे आटोपून घराकडे पायी परत येत होता. याचवेळी एका अज्ञात वाहन चालकाने त्याला धडक दिली. या धडकेत विजय हा रस्त्याकडील शेतात फेकल्या गेला. डोक्याला गंभीर दुखापत झाल्याने त्याचा घटनास्थळीच मृत्यू झाला. या घटनेच्या काही वेळेनंतर किशोर प्रभाकर शरणागत येथून जात असताना रस्त्यालगतचच्या शेतात विजयचा मृतदेह आढळून आला. त्याने लागलीच विजयच्या कुटुंबीयांना महिती दिली तसेच पोलिसांना कळविले. रामटेक पोलिसांनी घटनास्थळी धाव घेत मृतदेहाचा पंचनामा करून अज्ञात वाहन चालकाविरुद्ध भादंवि कलम २७९, ३०४ (अ), सहकलम १८४ अन्वये गुन्हा दाखल केला आहे. पुढील तपास पोलीस निरीक्षक प्रमोद मकेश्वर यांच्या मार्गदर्शनाखाली पोलीस उपनिरीक्षक प्रमोद राऊत, अंमलदार सचिन गेडाम करीत आहेत. विजयच्या पश्चात पत्नी, चार वर्षाचा मुलगा व एक वर्षाची मुलगी आहे.