आरोपीला जन्मठेपेऐवजी १० वर्षे कारावास

नागपूर : मुंबई उच्च न्यायालयाच्या नागपूर खंडपीठाने चंद्रपूर जिल्ह्यातील खून प्रकरणामध्ये आरोपी लक्ष्मण भीमा मडावी याला जन्मठेपेची शिक्षा रद्द करून १० वर्षे सश्रम कारावासाची सुधारित शिक्षा सुनावली तर, त्याच्या पत्नी व मुलांना निर्दोष सोडले. न्यायमूर्तीद्वय विनय देशपांडे व अमित बोरकर यांनी हा निर्णय दिला.

५ एप्रिल २०१८ रोजी सत्र न्यायालयाने लक्ष्मणला जन्मठेप व ५ हजार रुपये दंडाची तर, पत्नी शोभा आणि मुले संदीप व प्रदीप यांना ३ वर्षे सश्रम कारावास व ३ हजार रुपये दंडाची कमाल शिक्षा सुनावली होती. त्या निर्णयाविरुद्ध आरोपींनी उच्च न्यायालयात अपील दाखल केले होते. उच्च न्यायालयाने सत्र न्यायालयाच्या निर्णयात बदल केला. मृताचे नाव जगन्नाथ उरकुडे होते. ८ सप्टेंबर २०१० रोजी रोडवर बैल बांधण्याच्या कारणावरून आरोपींनी उरकुडेसोबत वाद घातला. वाद वाढल्यानंतर आरोपींनी उरकुडे व त्याचा मुलगा राजू यांच्या डोळ्यात मिरची पावडर फेकून त्यांना उभारी व काठ्यांनी जबर मारहाण केली होती. आरोपींच्या वतीने ॲड. मीर नगमान अली यांनी कामकाज पाहिले.