१० प्रतिष्ठानांवर कारवाई, ६० हजारांचा दंड वसूल

नागपूर : नागपूर महापालिकेच्या उपद्रव शोध पथकाने मंगळवारी १० प्रतिष्ठानांवर कारवाई करून ६० हजारांचा दंड वसूल केला. दरम्यान, उपद्रव पथकाने शहरातील ९७ प्रतिष्ठाने व मंगल कार्यालयांची तपासणी केली. शारीरिक अंतर न पाळणाऱ्यांकडून दंड वसूल केला.

मनपा आयुक्त राधाकृष्णन बी. यांच्या निर्देशानुसार, उपद्रव शोध पथक प्रमुख वीरसेन तांबे यांच्या मार्गदर्शनाखाली झोन शोध पथकांनी ही कारवाई केली. लक्ष्मीनगर झोनअंतर्गत ८ मंगल कार्यालयांची तपासणी करण्यात आली. धरमपेठ झोनअंतर्गत सहा प्रतिष्ठानांची तपासणी करून १० हजार रुपये दंड वसूल केला. हनुमाननगर झोन येथील पाच प्रतिष्ठानांची तपासणी करण्यात आली. धंतोली झोनअंतर्गत ८ मंगल कार्यालये व लॉनची तपासणी करण्यात आली. ५ हजार दंड वसूल केला. नेहरूनगर झोनमधील १३ प्रतिष्ठानांची तपासणी करण्यात आली. सतरंजीपुरा झोनमधील ९ प्रतिष्ठानांची तपासणी करून १० हजार दंड वसूल केला. लकडगंज झोनअंतर्गत ११ प्रतिष्ठानांची तपासणी करून पाच हजार दंड वसूल केला. आशीनगर झोनमध्येही १४ प्रतिष्ठाने तपासून १० हजार रुपये दंड केला. मंगळवारी झोनमधील १६ प्रतिष्ठानांची तपासणी करून ५ हजार दंड वसूल करण्यात आला.