ब्युटी पार्लरच्या आड कुंटनखाना

लोकमत न्यूज नेटवर्क

नागपूर - पंचशिल चौकात एका ईमारतीत

ब्युटी आणि मसाज पार्लरच्या आडून चालविल्या जाणाऱ्या कुंटनखान्यावर गुन्हे शाखेच्या सामाजिक सुरक्षा पथकाने मंगळवारी सायंकाळी छापा मारला. या छाप्यात दोन वारांगणा पोलिसांच्या हाती लागल्या.

पंचशिल चौकाजवळच्या एका हॉस्पिटलनजीकच्या इमारतीत निर्वाणा ब्युटी अॅन्ड मसाज पार्लच्या आड कुंटनखाना चालविला जात असल्याची माहिती मिळताच सामाजिक सुरक्षा पथकाचे निरीक्षक रवी नागोसे आणि त्यांच्या सहकाऱ्यांनी कारवाईसाठी सापळा रचला. मंगळवारी सायंकाळी ४.३० च्या सुमारास एक पंटर पाठवून पोलिसांनी तेथील व्यवस्थापक अग्रदीप विमलदास (वय २०)याच्याशी २ हजारांत साैदा केला. त्याने रक्कम घेऊन दोन वारांगणा ग्राहकांच्या हवाली केल्या. त्यानंतर काही वेळेतच तेथे पोलिसांनी छापा घातला. पोलिसांनी वेश्याव्यवसाय करणाऱ्या ३२ आणि २३ वर्षीय दोन वारांगणांना ताब्यात घेतले. त्यांच्या बयानावरून आरोपी व्यवस्थापक अग्रदीप विमलदासला अटक करण्यात आली.

---

सहा महिन्यांपासून सुरू

या कुंटनखान्याचा संचालक गाैरवदास आणि विभुतीबाला बिसेन फरार आहेत. संचालक आणि व्यवस्थापक हे दोघेही पश्चिम बंगालमधील रहिवासी असून त्यांनी जानेवारी २०२१ मध्ये या पार्लरचे गाजावाजा करून उद्घाटन केले होते. काही दिवस पार्लर आणि नंतर तेथे कुंटनखाना सुरू करण्यात आल्याची प्राथमिक माहिती आहे.

---