पुन्हा एक दिवाळी स्पेशल नागपूरमार्गे धावणार; सनतनगर-रायपूर-सनतनगर, दिवाळी, छटपूजेसाठी जाणाऱ्यांना दिलासा

दिवाळी आणि छटपूजेसाठी आपापल्या गावात जाण्याचे नियोजन करणाऱ्या प्रवाशांना रेल्वे प्रशासनाने दिलासा दिला आहे. ३१ ऑक्टोबरपासून सनतनगर-रायपूर-सनतनगर ही दिवाळी स्पेशल ट्रेन नागपूर मार्गे धावणार आहे.

नागपूर : दिवाळी आणि छटपूजेसाठी आपापल्या गावात जाण्याचे नियोजन करणाऱ्या प्रवाशांना रेल्वे प्रशासनाने दिलासा दिला आहे. ३१ ऑक्टोबरपासून सनतनगर-रायपूर-सनतनगर ही दिवाळी स्पेशल ट्रेन नागपूर मार्गे धावणार आहे.

२४ कोच असलेल्या या ट्रेनमध्ये २ एसएलआर/ एसएलआरडी, २ सामान्य, ११ शयनयान, ७ एसीथ्री आणि एसटी टूचे दोन कोच राहणार आहे. ०७०२३ ही गाडी ३१ ऑक्टोबर, ७ आणि १४ नोव्हेंबरला सनतनगर येथून रात्री ९ वाजता निघेल आणि दुसऱ्या दिवशी सकाळी ८:२० वाजता ती नागपूर रेल्वे स्थानकावर पोहोचेल. येथून पुढे निघाल्यानंतर सकाळी १०:२५ वाजता गोंदिया, ११:८ वाजता राजनांदगाव, १२:३० वाजता दुर्ग आणि दुपारी १:४५ वाजता रायपूरला पोहोचेल.

त्याचप्रमाणे १, ८ तसेच १५ नोव्हेंबरला ०७०२४ रायपूर सनतनगर ही गाडी रायपूर रेल्वे स्थानकावरून सायंकाळी ४:४५ वाजता सुटेल. ती दुर्गला ५:४० वाजता, राजनांदगावला सायंकाळी ६ वाजता, ७:३७ वाजता गोंदिया आणि रात्री ९:३५ वाजता नागपूरला पोहोचेल. येथून दुसऱ्या दिवशी सकाळी ७:३५ वाजता सिकंदराबाद आणि सकाळी ९:३० वाजता सनतनगरला पोहोचेल.

या स्पेशल ट्रेनमुळे दिवाळी, छटपूजेसाठी गावाला जाणाऱ्या प्रवाशांना दिलासा मिळेल, असा विश्वास दक्षिण पूर्व मध्य रेल्वे प्रशासनाने व्यक्त केला आहे.