श्वानामुळे वाढलेल्या वादात बापलेकांवर हल्ला

अनमोल यादवराव चाैधरी (वय २१) आणि आरोपी कालू शेख हे आजूबाजूला राहतात. कालू हा गुन्हेगारीवृत्तीचा आहे. त्यांच्यात गेल्या काही दिवसापासून नाजूक मुद्यावरून वाद सुरू आहे. काही दिवसापूर्वी अनमोलच्या वाहनाचा कालूच्या श्वानाला कट लागला. त्यामुळे कालूच्या पत्नीसोबत अनमोलचा वाद झाला. तो वाढल्याने अनमोलने पोलिसांकडे तक्रार नोंदवली. यामुळे आरोपी कालू्च्या मनात खुन्नास होती. त्याने रविवारी रात्री आपल्या साथीदारांना घरी बोलवून घेतले. अनमोल दिसताच माझ्या श्वानाला का मारले आणि माझ्या पत्नीच्या विरोधात पोलिसांकडे तक्रार का केली, असे प्रश्न करून कालूने वाद वाढवला. त्यानंतर कालू, त्याची पत्नी तसेच साथीदार रज्जाक शेख, छोट्या सहारे, पिंटू सहारे आणि इतर साथीदारांनी लोखंडी रॉडने अनमोलवर हल्ला चढवून त्याला गंभीर जखमी केले. मुलाला मारहाण होत असल्याचे पाहून त्याचे वृद्ध वडील यादवराव चाैधरी मदतीला धावले असता त्यांनाही आरोपींनी बेदम मारहाण केली. आरडाओरड ऐकून शेजारी धावले. त्यांनी आरोपींना बाजूला केले. अनमोलने नंतर जरीपटका ठाण्यात तक्रार नोंदवली. पोलिसांनी विविध कलमानुसार कालू आणि साथीदारांविरुद्ध गुन्हा दाखल केला.

---