अवनीला बेकायदेशीरपणे ठार मारण्यात आले

नागपूर : अर्थ ब्रिगेड फाउंडेशनने मुंबई उच्च न्यायालयाच्या नागपूर खंडपीठात अतिरिक्त प्रतिज्ञापत्र दाखल करून अवनी (टी-१) वाघिणीला बेकायदेशीरपणे ठार मारण्यात आले, असा आरोप केला आहे.

अवनीला यवतमाळ जिल्ह्यातील पांढरकवडा वनपरिक्षेत्रामध्ये ठार मारण्यात आले आहे. त्यासाठी खासगी शिकाऱ्यांचे विशेष पथक स्थापन करण्यात आले होते. अवनी नरभक्षक होती असा वनविभागाचा दावा आहे. यासंदर्भात अर्थ ब्रिगेड फाउंडेशनची जनहित याचिका उच्च न्यायालयात प्रलंबित आहे. या प्रकरणाची सखोल चौकशी करून सत्य शोधून काढण्याची फाउंडेशनची मागणी आहे. त्यात फाउंडेशनने अतिरिक्त प्रतिज्ञापत्र दाखल करून आणखी काही धक्कादायक मुद्द्यांकडे न्यायालयाचे लक्ष वेधले. हैदराबाद पोलीस आयुक्तांनी विशेष पथकातील शिकारी शफतअली खान व असगरअली खान यांच्याकडील शस्त्र परवान्याची माहिती दिली नाही. तसेच या दोघांच्या शस्त्र परवान्याच्या प्रती मिळण्यासाठी यवतमाळ पोलीस अधीक्षकांना मार्च-२०२१ मध्ये अर्ज सादर करण्यात आला आहे. परंतु त्यांनी अद्याप प्रती दिल्या नाही. त्यावरून या दोघांच्या शस्त्र परवान्याच्या प्रती कुणाकडेच नाही हे स्पष्ट होते. अवनीला ठार मारण्यापूर्वी शफतअली खान यांच्या गैरवर्तनाविषयी वनाधिकाऱ्यांकडे तक्रारी करण्यात आल्या होत्या. परंतु, पथकाकडील शस्त्रे, दारूगोळा व शस्त्र परवाने तपासण्याची तसदी कुणीच घेतली नाही. विशेष पथकात असगर अली खान यांचा समावेश करण्यात आल्याचे यवतमाळ पोलीस अधीक्षकांना कळविण्यात आले नव्हते. त्यावरून त्यांचा पथकात समावेश नव्हता हे सिद्ध होते. अवनी ही असगरअली खान यांनी झाडलेल्या बंदुकीच्या गोळीमुळेच मारली गेली. परंतु, सत्य लपवले जात आहे असे फाउंडेशनने प्रतिज्ञापत्रात म्हटले आहे.