वाहन चोरीच्या प्रकरणात बालाघाटचा युवक ताब्यात

नागपूर : पारडी पोलिसांनी ॲक्टिव्हा चोरीच्या प्रकरणात सहभागी बालाघाटच्या युवकाला अटक केली आहे. आरोपी अंकुश सतीश लखेरा (२३, रा. लखेरा मोहल्ला, बालाघाट, एमपी) हा आहे. दीड महिन्यापूर्वी शिवजयंतीच्या दिवशी भांडेवाडी निवासी धीरज चिंचघरे यांची घरापुढे उभी असलेली ॲक्टिव्हा चोरीला गेली होती. पोलिसांनी १२ एप्रिल रोजी अंकुशला ॲक्टिव्हासह पकडले. विचारपस केल्यावर ॲक्टिव्हा धीरजची असल्याची माहिती मिळाली. अंकुश धंतोली येथील तकीया परिसरात भाड्याच्या घरात राहतो. त्याच्याविरोधात चोरीचे प्रकरण नोंदविण्यात आले आहे. ही कारवाई एपीआय मारुती शेलगे, हवालदार भगन राऊत, शिपाई राजेश नाईक, विजय लांडे व मनोहर रेहपाडे यांनी केली.

-------------

दारूची अवैध विक्री करणाऱ्या तिघांना अटक

नागपूर : यशोधरानगर पोलिसांनी दारूची अवैध विक्री करणाऱ्या महिलेसह तिघांना अटक केली आहे. आरोपी सावित्रीबाई जागोजी पराते (६०, रा. बिनाकी मंगळवारी), कृष्णा कन्हैयालाल निमजे (५२, रा. गुलशननगर) व चंद्रशेखर रामभाऊ चिकाटे (४१, रा. संजय गांधीनगर) हे आहेत. दारूच्या अवैध विक्रेत्यांविरोधात सुरू असलेल्या मोहिमेंतर्गत पोलिसांनी आरोपींना अटक केली आहे. त्यांच्याकडून ॲक्टिव्हासह ६२ हजार रुपयाचे साहित्य जप्त करण्यात आले. त्यांच्याविरोधात मद्यविरोधी कायद्यांतर्गत गुन्हा नोंदविण्यात आला आहे. ही कारवाई पीआय अशोक मेश्राम, पीएसआय जितेंद्र भागव, एएसआय विनोद सोलव, अक्षय सोरदे, शिपाई विशाल साखरे व किशोर धोटे यांनी केली.

................