मुळात शिंदे सरकार बेकायदेशीर; संजय राऊत यांची नागपुरात टीका

Nagpur News मुळात हे सरकार बेकायदेशीर आहे. १६ आमदारांवर अपात्रतेची तलवार असताना ते जर १९ तारखेला शपथ घेत असतील तर ते घटनाबाह्य आणि घटनाद्रोही आहे, अशी टीका शिवसेनेचे नेते खासदार संजय राऊत यांनी केली.

ठळक मुद्दे सोळा आमदारांवर अपात्रतेची तलवार कायम

नागपूर : मुळात राज्यात अद्याप सरकार अस्तित्वात आलेले नाही. गुरुवारी दोघांची कॅबिनेट झाली. अद्याप सरकारचा शपथविधी झाला नाही. मुळात हे सरकार बेकायदेशीर आहे. १६ आमदारांवर अपात्रतेची तलवार असताना ते जर १९ तारखेला शपथ घेत असतील तर ते घटनाबाह्य आणि घटनाद्रोही आहे, अशी टीका शिवसेनेचे नेते खासदार संजय राऊत यांनी केली.

खासदार संजय राऊत यांचे गुरुवारी दुपारी नागपुरात आगमन झाले. विमानतळावर शिवसेनेच्या कार्यकर्त्यांनी त्यांचे जंगी स्वागत केले. यावेळी पत्रकारांशी बोलताना राऊत म्हणाले, ज्या पद्धतीने या सरकारचे काम चालू आहे, मागच्या सरकाने जनतेचे आणि राज्याचे हित पाहून घेतले होते; पण विरोधासाठी विरोध, या भूमिकेतून हे दोघांचं कॅबिनेट काम करत असेल, तर पाहू. दिवस बदलत जातात. भविष्यात सत्तांतर होत असते. त्यामुळे विरोधासाठी विरोध असे काम करू नये.

मी फडणवीस यांच्या शहरात आलोय. पक्षाच्या कामासाठी आलोय. सगळं जागच्या जागी आहे. माझं स्वागत करायला सगळे आलेत. हे चित्र महाराष्ट्रात दिसतेय.

- बंड हा भास आहे, शिवसेना अशा अनेक प्रसंगांतून बाहेर पडलीय. ५६ वर्षांत अनेक संकटं, वादळं आम्ही पाहिली आहेत. शिवसेना पदाधिकाऱ्यांची मते जाणून घेण्यासाठी उद्धव ठाकरे यांनी मला इथे पाठवले आहे. इथले कुणीही बाहेर गेले नाही, असेही त्यांनी स्पष्ट केले.

आ. जयस्वाल यांच्या रामटेकवर लक्ष

- शिंदे गटात सामील झालेले आमदार आशिष जयस्वाल यांच्या रामटेक मतदारसंघावर शिवसेनेने आतापासून फोकस केल्याचे दिसते आहे. संजय राऊत यांनीही गुरुवारी आपण नागपुरात रामटेक मतदारसंघातील शिवसैनिकांची बैठक घेऊन त्यांची मते जाणून घेणार असल्याचे स्पष्ट केले. सोबतच आपल्या स्वागतासाठी रामटेकहून अनेक कार्यकर्ते आल्याचेही त्यांनी आवर्जून सांगितले.