भाग्यश्री वासनकरचा जामीन फेटाळला

शिवाजीनगर येथे वासनकर वेल्थ मॅनेजमेंट या नावाने गोरखधंदा उघडून आकर्षक व्याजाचे आमिष दाखवून ४७८

नागपूर : शिवाजीनगर येथे वासनकर वेल्थ मॅनेजमेंट या नावाने गोरखधंदा उघडून आकर्षक व्याजाचे आमिष दाखवून ४७८ गुंतवणूकदारांची १६९ कोटी रुपयांनी लुबाडणूक केल्याप्रकरणी एमपीआयडी कायद्याचे विशेष न्यायाधीश व्ही.टी. सूर्यवंशी यांच्या न्यायालयाने या प्रकरणातील सूत्रधारांपैकी एक भाग्यश्री प्रशांत वासनकर हिचा जामीन अर्ज सोमवारी फेटाळून लावला.
२ कोटी ७५ लाख ३६ हजार रुपयांनी फसवणूक झाल्याने लक्ष्मीनगर येथील रहिवासी विवेक अशोक पाठक यांच्या तक्रारीवरून ९ मे २०१४ रोजी अंबाझरी पोलीस ठाण्यात प्रशांत वासनकरसह नऊ जणांविरुद्ध भादंविच्या ४२०, ४०६, ५०६, १२० (ब), ४०९ आणि एमपीआयडी कायद्याच्या कलम ३ अन्वये गुन्हा दाखल करण्यात आले होते.
वासनकर वेल्थ मॅनेजमेन्ट कंपनीने वार्षिक ४० ते १५० टक्के जादा व्याजाचे आमिष दाखवून मासिक, तिमाही, वार्षिक, द्विवार्षिक, १८ महिने, ३३ महिने, ४८ महिने, पर्क, लिक्विड अशा वेगवेगळ्या आकर्षक योजनांतर्गत गुंतवणूकदारांच्या २००८ पासून मोठमोठ्या रकमांच्या ठेवी स्वीकारल्या होत्या. या ठेवी ३० टक्के चेकद्वारे आणि ७० टक्के रोखीने होत्या. कंपनीने मुदत संपूनही ठेवी परत केल्या नव्हत्या आणि परतावा देखील दिलेला नव्हता.
धंदा भरभराटीस आल्यानंतर भाग्यश्री हिने ठेवीदारांच्या गुंतवणुकीतून प्राप्त झालेला पैसा वासनकर वेल्थ मॅनेजमेंटच्या खात्यातून स्वत:च्या खात्यात वळवून ५ कोटी ५८ लाख रुपये किमतीचे शेअर्स मुंबई येथील नरेश चंदन आणि चेतना चंदन यांच्यामार्फत खरेदी केले. हे शेअर्स १ लाख २४ हजार ८८ एवढे असून ते सिक्कीम फेरो अलॉईड या कंपनीचे आहेत. गुंतवणूकदारांना सदस्य बनवण्यापोटी भाग्यश्रीने १८ कोटी रुपये प्राप्त केले होते. याशिवाय तिने कंपनीचे २५ कोटी रुपये स्वत:च्या खात्यात वळते केले होते. ती परिधी ट्रेडिंगची संचालक असताना परिधीच्या खात्यातील रोख आणि शेअर्सही तिने आपल्या वैयक्तिक खात्यात जमा केले होते.
आपल्या खात्यातून तिने नरेश चंदन, अनिल सावरकर, विलास भोयर, सदोदय इन्व्हेस्टमेंट, रिना जैन, रत्नेश जैन, अविनाश भुते यांना मोठमोठ्या रकमा दिल्या आहेत.
प्रशांत, विनय वासनकर आणि अभिजित चौधरी हे कारागृहात असताना भाग्यश्रीने कंपनीच्या वेल्थ व्यवस्थापक सारिका चंदेल हिला कारागृहात पाठवून तिच्यामार्फत सामंजस्य करार तयार करून घेतला होता. त्यानंतर भाग्यश्रीने या करारावर गुंतवणूकदारांच्या सह्या घेतल्या होत्या.
भाग्यश्रीचा विशेष न्यायालयात आतापर्यंत दोन वेळा जामीन अर्ज फेटाळल्या गेला आहे. न्यायालयात सरकारच्या वतीने अतिरिक्त सरकारी वकील कल्पना पांडे तर आरोपीच्या वतीने अ‍ॅड. चंद्रशेखर जलतारे यांनी काम पाहिले. (प्रतिनिधी)