भरधाव कारच्या धडकेत दुचाकीस्वार ठार, कारचालक फरार

अजनी पोलिसांनी केला गुन्हा दाखल

नागपूर : भरधाव कारने धडक दिल्यामुळे दुचाकीस्वार ठार झाल्याची घटना अजनी पोलिस ठाण्याच्या हद्दीत बुधवारी सकाळी १०.४५ वाजताच्या सुमारास घडली. अपघातानंतर कारचालक घटनास्थळावरून फरार झाला असून अजनी पोलिसांनी कारचालकाविरुद्ध गुन्हा दाखल केला आहे.

विशाल मनोहर कोसरे (वय २७, रा. डोंगरगाव पो. खजरी, जि. गोंदिया) हे अजनी पोलिस ठाण्याच्या हद्दीत लोहार समाज भवन, शताब्दीनगर येथे आशु कबाडीच्या दु कानासमोरून हिरो होंडा पॅशन गाडी क्रमांक एम. एच. ३१, डी. पी-८५५४ ने जात होते. तेवढ्यात कार क्रमांक एम. एच. ४०, ई. एच-६३०३ च्या चालकाने आपल्या ताब्यातील वाहन भरधाव वेगाने व निष्काळजीपणे चालवून कोसरे यांच्या दुचाकीला धडक दिली. यात त्यांच्या डोक्याला मार लागून ते गंभीर जखमी झाले. अपघातानंतर कार चालक घटनास्थळावरून फरार झाला.

कोसरे यांना उपचारासाठी मेडिकलमध्ये दाखल केले असता उपचारादरम्यान डॉक्टरांनी तपासून मृत घोषित केले. या प्रकरणी कल्पेश नारायण पटेल (वय ३२, रा. बेसा) यांनी दिलेल्या सुचनेवरून अजनी पोलिसांनी आरोपी कार चालकाविरुद्ध कलम २७९, ३०४ (अ), सहकलम १३४, १७७ नुसार गुन्हा दाखल करून तपास सुरु केला आहे.