भाजपाला सुवर्ण महोत्सवाची संधी की काँग्रेसला गतवैभव?

दिनकर ठवळे

कोराडी: जिल्ह्याचे लक्ष लागलेल्या कोराडी ग्रामपंचायतच्या निवडणूकीत यावेळी भाजपा विजयाच्या सुवर्ण महोत्सवाकडे वाटचाल करतो की काँग्रेस गतवैभव प्राप्त करते, याकडे राजकीय पोलपंडितांचे लक्ष लागले आहे. यावे‌ळी दोन्ही पक्षांनी ही निवडणूक प्रतिष्ठेची केली आहे. गत २० वर्षापासून ही ग्रा.पं. भाजपाच्या ताब्यात आहे. १९९५ पूर्वी कोराडी ग्राम पंचायतमध्ये सतत काँग्रेस गटाचे वर्चस्व राहिले आहे. पुनर्वसित कोराडी ग्रामपंचायतीचा पहिला सरपंच काँग्रेसच्या गटाचा होता. त्यामुळे पूर्वीचे वैभव प्राप्त करण्यासाठी व भाजपाच्या विजयाची सुवर्ण महोत्सवी वाटचाल रोखण्यासाठी काँग्रेसचा गट तयारीनिशी मैदानात उतरला आहे. कोराडी जुने गाव वीज केंद्राच्या व आजच्या जगदंबा मंदिर संस्थांच्या मागच्या दिशेला होते. त्या ठिकाणी असताना कोराडीचे सरपंच म्हणून माजी शिक्षण सभापती प्रेमलाल पटेल, दयाराम तडसकर, मधुकर चिंचूळकर, केशवराव समरितकर, महादेवराव बेलेकर आदींनी सरपंचपद भूषवून कोराडीचा मान वाढला आहे. त्यानंतर १९८५ मध्ये पुनर्वसित कोराडी आजच्या ठिकाणी प्रस्थापित झाली. कोराडी पुनर्वसित झाल्यानंतर या ठिकाणी असलेल्या तत्कालीन महादुला ग्रामपंचायत व कोराडी ग्रामपंचायत यांच्यात सीमा वादाला प्रारंभ झाला. सीमावादाचे हे प्रकरण १९९५ पर्यंत न्यायालयात असल्याने या काळात कोराडी ग्रामपंचायतमध्ये प्रशासकीय राजवट होती. यानंतर १९९५ ला झालेल्या पहिल्या निवडणुकीत काँग्रेस गटाच्या माया डोंगरे या सरपंच झाल्या परंतु १९९८ ला त्यांच्यावर अविश्वास आणून रागिणी रंगारी ह्या सरपंच बनल्या. त्यानंतर २००० पासून आजपर्यंत या ठिकाणी भाजपाचेच सरपंच राहिले. २००० मध्ये विठ्ठल निमोणे, २००५ मध्ये नेहा भोयर अडीच वर्षांसाठी तर पुढील अडीच वर्षांसाठी अनुराधा आमीन, २०१० मध्ये अडीच वर्षांसाठी विठ्ठल निमोने तर त्यानंतर अडीच वर्ष बापू बिरखेडे, २०१५ मध्ये अडीच वर्षासाठी अर्चना मैद तर पुढील अडीच वर्ष सुनिता चिंचूरकर यांनी सरपंचपद भूषविले आहे. २००० पासून आजपर्यंतच्या २० वर्षाच्या काळात याठिकाणी भाजपच्या गटाला बहुमताने सत्ता मिळाली. गत गतवेळी १७ पैकी १७ ही ग्रामपंचायत सदस्य भाजप गटाचे होते. भाजपच्या या ठिकाणचे नेतृत्व माजी ऊर्जामंत्री व चंद्रशेखर बावनकुळे हेच सांभाळत आहेत. काँग्रेसच्या वतीने महासचिव सुरेश भोयर, हुकूमचंद आमधरे, कोराडी जिल्हा परिषद सर्कलचे सदस्य नाना कंभाले आदी बाजू सांभाळत आहेत.