कॅफे सेंटरची भिंत फोडून साहित्य लंपास

लोकमत न्यूज नेटवर्क

नागपूर : फार्मसीसमोर कॅफे सेंटर लावणाऱ्या तरुणाला धडा शिकविण्यासाठी फार्मसीच्या मालकाने अजब भूमिका घेतली. पान सेंटरच्या शटरसमोर विटांचा ढिगारा लावला, तर मागच्या बाजूची भिंत फोडून आतमधून चहा आणि ज्यूसच्या मशीनसह दीड लाखांचा ऐवज चोरून नेला. रविवारी सकाळी ही घटना उघडकीस आल्यानंतर, शांतीनगरातील वातावरण गरम झाले.

फिर्यादी शेख अमिर शेख मुख्तियार (वय ३०) हा बेलेनगरात राहतो. त्याने महेशनगरात युनिव्हर्सल फार्मसीसमोर साई पान कॅफे नावाचे दुकान किरायाने घेतले आहे. तेथे तो पान, चहा, ज्यूस आणि कोल्ड्रिंक विकतो. तेथे होणाऱ्या गर्दीमुळे फार्मसीचा मालक दिनेश आनंदराव सोनटक्के (वय ४५) सोबत अमिरचा वाद सुरू झाला. या पार्श्वभूमीवर अमिर त्याचे कॅफे सेंटर बंद करून शनिवारी रात्री १०.३०ला घरी गेला. त्यानंतर, आरोपी दिनेश सोनटक्केने आपल्या साथीदाराच्या मदतीने अमिरच्या दुकानसमोर विटांचा ढिगारा लावला. त्यानंतर, कॅफेची मागची भिंत तोडून चहाची, ज्यूसची मशीन, फ्रीज, दोन फोन, कूलर आणि २५ हजारांची रोकड असे दीड लाखांचे साहित्य चोरून नेले. रविवारी सकाळी ८च्या सुमारास ही घटना उघडकीस आल्यानंतर परिसरातील वातावरण तापले. अमिरने दिलेल्या तक्रारीवरून शांतीनगर पोलिसांनी गुन्हा दाखल केला. पुढील तपास सुरू आहे.

----