भरधाव कारची धडक

लोकमत न्यूज नेटवर्क

नागपूर - चालकाने निष्काळजीपणे वाहन चालवून एका दुचाकीचालकाला जोरदार धडक मारली. त्यामुळे तो गंभीर जखमी झाला. रविवारी सकाळी १० च्या सुमारास सुरेंद्रनगर आरपीटीएस रोडवर हा अपघात घडला. सचिन पारधी (वय ३१, रा. न्यू काछीपुरा) असे जखमीचे नाव असून, त्याची प्रकृती गंभीर असल्याचे समजते.

सचिन त्याच्या दुचाकीने जात असताना सुसाट वेगाने आलेला कारचालक हर्षवर्धन रत्नपारखी याने त्याला जोरदार धडक मारली. त्यामुळे तो गंभीर जखमी झाला. वर्दळीच्या ठिकाणी हा अपघात घडल्याने मोठ्या प्रमाणात गर्दी जमली. त्यातील बघ्यांनी कारचालक रत्नपारखीवर दबाव निर्माण केल्यानंतर, तो जखमी सचिनला घेऊन एका खासगी इस्पितळात दाखल झाला. दरम्यान, या अपघाताची माहिती कळताच बजाजनगर पोलीस पोहचले. त्याचप्रमाणे सचिनच्या वस्तीतील मंडळी आणि रत्नपारखीचेही मित्र रुग्णालयात पोहचले. सचिनची प्रकृती गंभीर असल्याचे कळाल्यानंतर वातावरण संतप्त झाले. ते बघून बजाजनगर पोलिसांनी दोन्हीकडच्या मंडळींना बजाजनगर ठाण्यात नेले. तेथे भलतीसलती चर्चा सुरू झाल्याने वातावरण पुन्हा तापले. सेटलमेंटची चर्चा सुरू होताच जखमी सचिनच्या हितचिंतकांनी सरळ वरिष्ठांना माहिती दिली. त्यानंतर बजाजनगर पोलिसांनी कारचालक आरोपी रत्नपारखीची चाैकशी सुरू केली. सूत्रांच्या माहितीनुसार, आरोपी कारचालकाकडे परवाना नव्हता. तरीसुद्धा तो हवेत कार चालविल्यासारखा चालवत होता. वृत्त लिहिस्तोवर या प्रकरणात पोलिसांकडून चाैकशी सुरू होती.

----