कारला मालवाहूची धडक; तरुणाचा मृत्यू

काटोल : पत्नीला माहेरी सोडून गावाकडे परतणाऱ्या तरुणाच्या कारला मालवाहूने धडक दिली. या अपघातात प्रशीस हरिचंद्र उभाळे (२८, रा. वरूड, जि.अमरावती) याचा घटनास्थळीच मृत्यू झाला. पारडसिंगा गावासमोरील पुलाजवळ रविवारी सकाळी ८.३० वाजताच्या सुमारास हा अपघात झाला.

काही महिन्याआधीच प्रशीसचा विवाह नागपूर येथील तरुणीशी झाला होता. घटनेच्या आदल्या दिवशी शनिवारी प्रशीसने पत्नीला मारोती कारने (एमएच २७ एसी ९०८८) तिच्या माहेरी नागपूर येथे सोडून दिले. रविवारी सकाळी तो नागपूर येथून वरूडला घरी परतताना पारडसिंगा गावासमोरील पुलाजवळ पोहोचताच विरुद्ध दिशेने येणाऱ्या बोलेरो मालवाहूने (क्र. एमएच २६ व्ही ४४५२) त्याच्या कारला जबर धडक दिली. सकाळी ८.३० वाजताच्या सुमारास घडलेल्या या अपघातात प्रशीस गंभीर जखमी झाल्याने त्यांचा घटनास्थळीच मृत्यू झाला. काटोल पोलिसांनी घटनास्थळ गाठून मृतदेह ताब्यात घेतला. घटनेची माहिती प्रशीसच्या कुटुंबीयांना देण्यात आली. याप्रकरणी हरिचंद्र सूर्यभान उभाळे यांच्या तक्रारीवरून मालवाहू चालकाच्या विरोधात अपघाताचा गुन्हा नोंदविण्यात आला.

संसार ठरला औटघटकेचा

प्रशीसचा दोन महिन्यांपूर्वी विवाह झाला होता. पती-पत्नीने सुखी आयुष्याची स्वप्ने बघितली होती. मात्र त्यांची ही स्वप्ने पूर्ण होण्याआधीच काळाने घाला घातल्याने त्यांचा संसार औटघटकेचा ठरला. ज्या घरात लग्नामुळे सर्वत्र आनंदाचे वातावरण होते तिथे प्रशीसच्या मृत्यूच्या बातमीने शोककळा पसरली.