हद्दपार गुंडाकडून सिनेस्टाईल लुटमार

पोलिसांनी लावला छडा : तिघांना अटक, मुद्देमाल जप्त

लोकमत न्यूज नेटवर्क

नागपूर : दुचाकीवर जात असलेल्या तरुणाला ऑटोची धडक मारून त्याची दुचाकी तसेच ६९ हजार रुपये हिसकावून नेणाऱ्या एका टोळीचा पाचपावली पोलिसांनी छडा लावला. या टोळीचा सूत्रधार हद्दपार गुंड असल्याचे पोलीस तपासात उघड झाले. फिरदोस ऊर्फ राजा अहमद निशाद अहमद (वय २३, रा. मोमीनपुरा), असे त्याचे नाव आहे.

पोलिसांनी त्याला तसेच मोहम्मद इरफान मोहम्मद इलियास अन्सारी आणि त्यांच्या एका अल्पवयीन साथीदाराला ताब्यात घेतले.

पाचपावलीतील नवा नकाशा परिसरात राहणारा साजिद अली शौकत अली (वय १९) हा तरुण २५ मेच्या मध्यरात्री दुचाकीने घरी जात होता. मागून आलेल्या ऑटोचालकाने त्याला धडक मारली. साजिद रस्त्यावर जखमी अवस्थेत पडला असताना आरोपी फिरदोस आणि साथीदारांनी त्याची दुचाकी तसेच दुचाकीच्या डिक्कीत असलेले ६० हजार रुपये घेऊन पळ काढला. दुसऱ्या दिवशी साजिदने पाचपावली पोलीस ठाण्यात या घटनेची तक्रार नोंदवली. पोलिसांनी घटनास्थळ परिसरातील सीसीटीव्ही फुटेज ताब्यात घेऊन ऑटोचा नंबर मिळवला. त्याआधारे आरोपी फिरदोस तसेच साथीदाराला अटक केली. त्यांच्या ताब्यातून साजिदची दुचाकी, ५६ हजार रुपये तसेच गुन्ह्यात वापरलेला ऑटो जप्त करण्यात आला.

---

हद्दपार करूनही नागपुरातच!

आरोपी फिरदोस हा कुख्यात गुन्हेगार आहे. त्याला नागपुरातून हद्दपार करण्यात आले आहे. मात्र तो येथे लपूनछपून राहून गुन्हे करीत असल्याचे या घटनेतून स्पष्ट झाले. पाचपावलीचे ठाणेदार संजय मेंढे, द्वितीय निरीक्षक मुकुंद ठाकरे, पोलीस उपनिरीक्षक प्रमोद खंदार आणि त्यांच्या साथीदारांनी ही कामगिरी बजावली.

---