कोविड लसीकरण माहिती अपलोडसाठी ‘को-विन’ अ‍ॅप

लोकमत न्यूज नेटवर्क

नागपूर : केंद्र शासनाच्या निर्देशानुसार नागपुरात कोविड लसीकरणाची तयारी सुरू झाली आहे. लसीकरणादरम्यान माहिती अपलोड करण्यासाठी ‘को-विन’ अ‍ॅप तयार करण्यात येत असल्याची माहिती बुधवारी शहरातील शासकीय, निमशासकीय आणि मनपा रुग्णालयातील वैद्यकीय अधिकाऱ्यांच्या टाऊन हॉल येथे आयोजित प्रशिक्षण शिबिरात देण्यात आली.

लसीकरण कसे करायचे, यासाठी कुठली जागा असावी, संबंधित जागेवर कोणत्या सोयी असाव्यात, लोकांना लसीकरण केंद्रावर कसे आणायचे, माहिती कोविड अ‍ॅपवर अपलोड करण्यासंदर्भात तज्ज्ञाकडून मार्गदर्शन करण्यात आले. मनपाचे वैद्यकीय आरोग्य अधिकारी डॉ. नरेंद्र बहिरवार यांनी कोविड-१९ साठी केलेल्या उपाययोजना आणि लसीकरण कार्यक्रमाची माहिती दिली. डॉ. वैशाली मोहकर यांनी लसीकरण नियोजनाची तर शासन दिशानिर्देश यावर एस.एम.ओ. (जागतिक आरोग्य संघटना)चे डॉ. साजीद खान यांनी व्हिडिओ, सादरीकरणाच्या माध्यमातून माहिती दिली.

को-विन अ‍ॅप बाबत अश्विनी नागर यांनी माहिती दिली. रविल यादव यांनी कोल्ड चेन आणि लॉजिस्टिक मॅनेजमेंट याबाबत मार्गदर्शन केले. सुरक्षित लसीकरण आणि जैविक कचऱ्याची विल्हेवाट लावण्याबाबत डॉ. संजय चिलकर यांनी मार्गदर्शन केले. टाटा ट्रस्टचे डॉ. टिकेश बिसेन, सहायक वैद्यकीय आरोग्य अधिकारी डॉ. प्रवीण गंटावार यांनीही विविध विषयावर मार्गदर्शन केले.

सहायक वैद्यकीय आरोग्य अधिकारी डॉ. विजय जोशी, नोडल अधिकारी (साथरोग) डॉ. गोवर्धन नवखरे, समन्वयक दीपाली नागरे यांनी सहकार्य केले.