ग्राहक मंच : माही लॅन्ड डेव्हलपर्सला दणका

जिल्हा ग्राहक तक्रार निवारण मंचने एका प्रकरणात तक्रारकर्त्या ग्राहकाच्या हिताचे विविध आदेश जारी करून माही लॅन्ड डेव्हलपर्स अ‍ॅन्ड बिल्डर्सला दणका दिला.

ठळक मुद्देतक्रारकर्त्याच्या हिताचे विविध आदेश जारी

 लोकमत  न्यूज  नेटवर्क
नागपूर : जिल्हा ग्राहक तक्रार निवारण मंचने एका प्रकरणात तक्रारकर्त्या ग्राहकाच्या हिताचे विविध आदेश जारी करून माही लॅन्ड डेव्हलपर्स अ‍ॅन्ड बिल्डर्सला दणका दिला.
नितीन तागडे असे ग्राहकाचे नाव असून ते न्यू सुभेदार ले-आऊट येथील रहिवासी आहेत. तागडे यांच्याकडून उर्वरित ३ लाख ९५ हजार रुपये स्वीकारून त्यांना भूखंडाचे नोंदणीकृत विक्रीपत्र करून द्यावे व भूखंडाचा प्रत्यक्ष ताबा देण्यात यावा, यात तांत्रिक किंवा कायदेशीर अडचण असल्यास तागडे यांना त्यांचे १ लाख ८१ हजार रुपये १४ टक्के व्याजाने परत करण्यात यावेत, व्याज १६ डिसेंबर २०१४ ते प्रत्यक्ष रक्कम अदा करण्याच्या तारखेपर्यंत देण्यात यावे असे आदेश मंचने डेव्हलपरला दिले. तसेच, तागडे यांना शारीरिक-मानसिक त्रासाकरिता २० हजार व तक्रारीचा खर्च म्हणून पाच हजार रुपये भरपाई मंजूर केली. या निर्णयावर अंमलबजावणी करण्यासाठी डेव्हलपरला एक महिन्याचा वेळ देण्यात आला. मंचचे अध्यक्ष संजय पाटील, सदस्य चंद्रिका बैस व सुभाष आजणे यांनी हा निर्णय दिला.
तक्रारीतील माहितीनुसार, तागडे यांनी माही डेव्हलपर्सच्या मौजा घोरपड, ता. कामठी येथील ले-आऊटमधील एक भूखंड ५ लाख ७६ हजार रुपयात खरेदी करण्याचा करार केला. दरम्यान, तागडे यांनी डेव्हलपरला १ लाख ८१ हजार रुपये दिले. उर्वरित रक्कम १३ ऑगस्ट २०१५ पर्यंत द्यायचे होते त्यानुसार, तागडे यांनी उर्वरित रक्कम देण्याची तयारी दर्शवून भूखंडाचे विक्रीपत्र करून मागितले. परंतु, डेव्हलपरने त्यांना प्रतिसाद दिला नाही. त्यामुळे तागडे यांनी डेव्हलपरला कायदेशीर नोटीस बजावली. ती नोटीस तामील झाली नाही. शेवटी तागडे यांनी मंचमध्ये तक्रार दाखल केली. त्यावर मंचने डेव्हलपरला नोटीस बजावली, पण ते मंचसमक्ष हजर झाले नाही. परिणामी, मंचने तक्रारीवर एकतर्फी कार्यवाही केली व रेकॉर्डवरील पुरावे लक्षात घेता तक्रार अंशत: मंजूर करून हा निर्णय दिला.
दोषपूर्ण सेवा दिली
तागडे उर्वरित रक्कम देण्यास तयार असतानाही डेव्हलपरने भूखंडाचे विक्रीपत्र करून दिले नाही व तागडे यांच्याकडून घेतलेली रक्कमही परत केली नाही. त्यावरून डेव्हलपरने अनुचित व्यापार प्रथेचा अवलंब केल्याचे व तागडे यांना दोषपूर्ण सेवा दिली असल्याचे स्पष्ट होते असे निरीक्षण मंचने निर्णयात नोंदवले.