प्रशासनाच्या आकडेवारीच्या चारपट कोरोना मृत्यू

लोकमत न्यूज नेटवर्क

नागपूर : मनपा प्रशासनाकडून शहरात कोरोनामुळे होणाऱ्या मृत्यूची आकडेवारी दररोज जाहीर केली जाते. परंतु प्रशासनाकडून जाहीर करण्यात येणारे आकडे आणि शहरातील दहन घाटावर करण्यात आलेले अंत्यसंस्कार, याचा विचार करता, जाहीर करण्यात येणाऱ्या आकडेवारीच्या चौपट अंतिम संस्कार होत असल्याचे धक्कादायक वास्तव आहे.

सोमवारी जिल्ह्यात ८९ जणांचा कोरोनामुळे मृत्यू झाला. यात शहरातील ५४, ग्रामीणमधील २५, तर जिल्ह्याबाहेरील १० जणांचा समावेश होता. परंतु शहरातील १४ घाटांवर सोमवारी तब्बल ३९२ मृतदेहांवर अंतिम संस्कार करण्यात आले. यात कोविडमुळे मृत्यू झालेल्यांची संख्या २८८ इतकी आहे, तर १०४ नॉनकोविड मृत्यूची नोंद घाटावर करण्यात आल्याचे ‘लोकमत’ चमूने केलेल्या प्रत्यक्ष पाहणीत दिसून आले.

एप्रिल महिन्यात कोरोना संसर्गामुळे मृत्यू होण्याचे प्रमाण प्रचंड वाढले आहे. यात गृह विलगीकरणातील रुग्णांचाही मोठ्या प्रमाणात समावेश आहे. याचा परिणाम शहरातील दहन घाटांवर दिसू लागला आहे. शहरातील घाटांवर दररोज ३५० ते ४०० अंतिम संस्कार होत आहेत. शहरातील प्रमुख पाच घाटांवर दररोज ४० ते ६० मृतदेहांवर अंतिम संस्कार केले जात आहेत.

....

प्रमुख घाटांवर वेटिंग

शहरातील गंगाबाई घाट, मोक्षधाम, मानेवाडा व अंबाझरी या प्रमुख घाटांवर दररोज ४० ते ६० कोविड मृतकांवर अंतिम संस्कार होतात. एकाचवेळी आठ ते दहा मृतदेह अंतिम संस्कारासाठी येत असल्याने मृतकांच्या नातेवाईकांना अंतिम संस्कारासाठी ओटे खाली होण्याची प्रतीक्षा करावी लागते. अनेकदा दीड ते दोन तास प्रतीक्षा करावी लागत आहे. शहरातील घाटावर रात्री उशिरापर्यंत चिता धुमसत असल्याचे पाहायला मिळत आहे.

....

१५ दिवसात ४ हजाराहून अधिक अंतिम संस्कार

कोरोना प्रकोपामुळे शहरात दररोज २५० हून अधिक लोकांचा मृत्यू होत आहे. यात रुग्णालयांतील रुग्णांच्या मृत्यूसोबतच गृह विलगीकरणात असलेल्यांचाही समावेश आहे.

गृह विलगीकरणातील असलेल्यांची नोंद होत नसल्याने त्यांचा कोविड मृत्यूत समावेश होत नसल्याचे महापालिकेच्या आकडेवारीवरून स्पष्ट होते.

...

दररोज ७० ते ८० नैसर्गिक मृत्यू

नागपूर शहराची लोकसंख्या ३० लाखांच्या आसपास आहे. शहरात दररोज ७० ते ८० मृत्यू नैसर्गिक व आजारामुळे होतात. परंतु कोरोना संक्रमणामुळे मृतकांचा आकडा हा ३०० ते ४०० पर्यंत पोहोचला आहे. यामुळे प्रमुख घाटावर एकाचवेळी आठ ते दहाजणांवर अंतिम संस्कार करावे लागत आहेत. ओटे खाली नसल्याने खालील जागेतही अंतिम संस्कार होत आहेत.

....

शहरातील घाटांवर सोमवारी करण्यात ओलेले अंत्यविधी...

घाट अंत्यविधी कोविड नॉन कोविड

सहकारनगर २० ११ ० ९

मानेवाडा ६३ ४३ २०

मोक्षधाम ४२ ३२ १०

अंबाझरी घाट ५२ ४३ ०९

दिघोरी-वाठोडा ४० २७ १३

गंगाबाई ६० ५० १०

शांतीनगर १२ ०९ ०३

वैशालीनगर २३ १४ ०९

मानकापूर २५ १८ ०७

पारडी घाट १८ १० ०८

पुणापूर घाट ०३ ०१ ०२

भरतवाडा घाट ०३ ०१ ०२

कळमना ०१ ०१ ००

नारा १३ ०९ ०४

एकूण ३९२ २८८ १०४

.................

...