नागपूर विभागातील धरणे कोरडीच

आॅगस्ट महिना सुरू होऊन तीन आठवडे होत आहे. परंतु विभागातील धरणे मात्र अजूनही कोरडीच आहेत. मोठ्या प्रकल्पांचा विचार केल्यास विभागातील १८ मोठ्या प्रकल्पांमध्ये केवळ ३५.१३ टक्के इतकाच पाणीसाठा शिल्लक आहे. आॅगस्टमध्ये नागपुरात सरासरी २६७ मिमी पाऊस होतो. परंतु यावर्षी १ ते १७ आॅगस्टपर्यंत केवळ ४४.९ मिमी पावसाची नोंद झाली आहे, ही परिस्थिती अशीच राहिल्यास उन्हाळ्यात पाणी टंचाईची समस्या निर्माण होईल का, असा प्रश्न निर्माण झाला आहे.

ठळक मुद्देकेवळ ३५.१३ टक्के साठा :उन्हाळ्यात पाणी टंचाईची भीती

लोकमत न्यूज नेटवर्क
नागपूर : आॅगस्ट महिना सुरू होऊन तीन आठवडे होत आहे. परंतु विभागातील धरणे मात्र अजूनही कोरडीच आहेत. मोठ्या प्रकल्पांचा विचार केल्यास विभागातील १८ मोठ्या प्रकल्पांमध्ये केवळ ३५.१३ टक्के इतकाच पाणीसाठा शिल्लक आहे. आॅगस्टमध्ये नागपुरात सरासरी २६७ मिमी पाऊस होतो. परंतु यावर्षी १ ते १७ आॅगस्टपर्यंत केवळ ४४.९ मिमी पावसाची नोंद झाली आहे, ही परिस्थिती अशीच राहिल्यास उन्हाळ्यात पाणी टंचाईची समस्या निर्माण होईल का, असा प्रश्न निर्माण झाला आहे.
जलसंपदा विभागाच्या अहवालानुसार नागपूर विभागातील मोठ्या प्रकल्पांमध्ये १८ आॅगस्ट रोजी केवळ ३५.१३ टक्के इतकाच जलसाठा आहे. नागपूर विभागात एकूण १८ मोठे प्रकल्प आहेत. त्याची एकूण पाणीसाठा क्षमता ३५५३.७७ दलघमी इतकी असून यात आजच्या तारखेला (१८ आॅगस्ट) १२४८.५४ दलघमी (३५.१३ टक्के) इतकाच पाणीसाठा आहे. यामध्ये नागपूर जिल्ह्यातील तोतलाडोह धरणाची पाणीसाठा क्षमता १०१६.८८ इतकी आहे. यात २०७.१५ दलघमी म्हणजे २०.३७ टक्के इतका पाणीसाठा आहे. यासोबतच कामठी खैरीमध्ये ४०.५२ टक्के, रामटेकमध्ये ३१.३६ टक्के, लोवर नांद वणा ७३.६३ टक्के, वडगाव ६०.४४ टक्के, गोंदिया जिल्ह्यातील इटियाडोह ४८.२५ टक्के, सिरपूर ४२.६० टक्के, पुजारी टोला ८१.३२ टक्के, कालिसरार ८२.२१ टक्के, धापेवाडा बॅरेज टप्पा २- ३२.१७ टक्के, चंद्रपूर जिल्ह्यातील असोलामेंढा १०० टक्के, गडचिरोली जिल्ह्यातील दिना ८०.५२ टक्के, वर्धा जिल्ह्यातील बोर २९.९३ टक्के, धाम ३३.७९ टक्के, पोथरा १०० टक्के, लोअर वर्धा टप्पा १- २६.७४ टक्के, भंडारा जिल्ह्यातील गोसीखुर्द टप्पा १ - ३२.६१ आणि बावनथडी १८.४२ टक्के इतका पाणीसाठा आहे.

पोथरा- असोलामेंढा हाऊसफुल्ल
विभागातील मोठ्या प्रकल्पांपैकी केवळ वर्धा जिल्ह्यातील पोथरा प्रकल्प आमि चंद्रपूर जिल्ह्यातील असोलामेंढा प्रकल्प १०० टक्के भरले आहे. परंतु या दोन्ही प्रकल्पांचा एकूण साठा कमी आहे. पोथराची क्षमता केवळ ३५ दलघमी तर असोलामेंढा ५२.३३ दलघमी इतका साठा आहे.

येत्या दिवसात धरणे भरण्याची शक्यता
जलसंपदा विभागाने जारी केलेल्या एकूण पाणीसाठ्याच्या माहितीनुसार गेल्या वर्षी आजच्याच तारखेचा एकूण पाणीसाठा पाहिला तर तो केवळ २२.६७ टक्के इतकाच होता. तेव्हा आॅगस्ट आणि सप्टेंबर महिना शिल्लक असल्याने येत्या दिवसात धरणे भरतील, असा विश्वास व्यक्त केला जात आहे. तसे झाले नाही तर उन्हाळ्यात तीव्र पाणी टंचाईचा सामना करावा लागू शकतो.

आॅगस्टमध्ये केवळ ४४.९ मिमी पाऊस
आॅगस्टमध्ये नागपुरात सरासरी २६७ मिमी पाऊस होतो. परंतु यावर्षी १ ते १७ आॅगस्टपर्यंत केवळ ४४.९ मिमी पावसाची नोंद झाली आहे. ३१ जुलैपर्यंत नागपुरात एकूण ८९९.२ मिमी इतकी पावसाची नोंद करण्यात आली आहे. आॅगस्ट महिन्यात सरासरी २६७ मिमी इतका पाऊस होतो. ४ आॅगस्ट १९७८ रोजी नागपुरात एकाच दिवशी २१५.४ मिमी पाऊस झाला. तो आॅगस्ट महिन्यात २४ तासात पडलेल्या पावसाचा रेकॉर्ड आहे.