धोका कोरोनाचा : आजपासून ड्रोन ठेवणार संवेदनशील वस्त्यांवर नजर

कोरोनाच्या प्रादुर्भावाच्या संदर्भात ज्या भागात अद्यापही पाहिजे तसे जनजागरण झाले नाही त्या भागात पोलीस आता ड्रोनच्या माध्यमातून जनजागरण करणार आहेत.

ठळक मुद्देड्रोनच्या माध्यमातून जनजागरणही

लोकमत न्यूज नेटवर्क
नागपूर : कोरोनाच्या प्रादुर्भावाच्या संदर्भात ज्या भागात अद्यापही पाहिजे तसे जनजागरण झाले नाही त्या भागात पोलीस आता ड्रोनच्या माध्यमातून जनजागरण करणार आहेत. आज पोलिसांनी या संबंधाने एका अत्याधुनिक ड्रोनची ट्रायल घेतली. मात्र काही तांत्रिक अडचणीमुळे संबंधित भागात पोलीस ड्रोन फिरवू शकले नाही. त्यामुळे शनिवारी तंत्रज्ञांची मदत घेऊन आवश्यक त्या उपाययोजना केल्या जातील. त्यानंतर हा ड्रोन संबंधित भागात जनजागरणासाठी फिरविला जाणार आहे.
कोरोनाचा धोका समजून सांगण्यासाठी पोलिसांनी आवश्यक ते सर्व उपक्रम हाती घेतले आहे. पोलिसांची गस्ती वाहने प्रत्येक भागात सकाळपासून रात्रीपर्यंत फिरून जनजागरण करीत आहेत. काही भागात पोलिसांनी सामाजिक संस्था, संघटनाच्या आणि सेवाभावी नागरिकांच्या मदतीने ऑटो लावूनही जनजागरण सुरू केले आहे. हजारावर कोविड योद्धेही सक्रिय करण्यात आले आहेत. मात्र शहरात अनेक असे भाग आहे ज्या भागात दाटीवाटीने घरे उभी आहेत. त्यामुळे त्या भागात पोलिसांची वाहने जात नाहीत. मोठी वाहनेच काय साधे ऑटोही त्या भागात जात नाही. त्यामुळे अशा भागात पाहिजे त्या प्रमाणात पोलिसांकडून जनजागरण होऊ शकलेले नाही. ही बाब ध्यानात घेऊन पोलीस आयुक्त डॉ. भूषणकुमार उपाध्याय यांनी आता जनजागरणासाठी ड्रोनची मदत घेण्याचा निर्णय घेतला आहे. त्यानुसार पोलीस लाईन टाकळी परिसरात आज ट्रायल म्हणून एक ड्रोन उडविण्यात आला. मात्र त्याला संलग्न करण्यात येणारे स्पीकर आणि इतर यंत्रणा कार्यान्वित झाली नाही. त्यामुळे आजचा प्रयोग सायंकाळी थांबविण्यात आला. शनिवारी तंत्रज्ञानांची मदत घेऊन ड्रोनला पॉवरफूल स्पीकर तसेच अन्य अत्याधुनिक उपकरणे जोडली जातील. त्यानंतर हा ड्रोन मोमीनपुरा, सतरंजीपुरा, भालदारपुरा आणि अशाच अन्य गर्दीच्या, दाटीवाटीच्या भागात फिरवला जाणार आहे. या ड्रोनला जोडण्यात आलेल्या स्पीकरमधून कोरोनाच्या प्रादुर्भावाचे धोके नागरिकांना समजावून सांगन्यात येईल. घरातच रहा, अशा सूचना देण्यासोबतच सोशल डिस्टन्सिंग पाळण्याबाबतही आवाहन केले जाईल. शनिवारपासून ड्रोन कार्यान्वित केला जाणार असल्याची माहिती गुन्हे शाखेचे अतिरिक्त पोलीस आयुक्त डॉ. नीलेश भरणे यांनी लोकमत'ला दिली.

दुहेरी उद्देश !
राष्ट्रपती, पंतप्रधान किंवा अशाच मोठ्या नेत्यांच्या सभा, रॅली किंवा जेथे प्रचंड प्रमाणात गर्दी झाली आहे, अशा ठिकाणी बंदोबस्ताचा, खबरदारीचा उपाय म्हणून ड्रोनचा वापर केला जातो. मात्र कोरोनाने सर्वत्र थैमान घालून प्रचंड दहशत निर्माण केली आहे. प्रादुर्भाव झपाट्याने वाढत आहे. तो रोखण्यासाठी नागपूरसह देशातील अनेक शहरात ड्रोनचा वापर केला जात आहे.
ड्रोन उडविण्याचा आमचाही दुहेरी उद्देश असल्याचे डॉ. भरणे यांनी सांगितले. ड्रोनच्या माध्यमातून एकीकडे आम्ही जनजागरण करू, दुसरीकडे त्या भागात गर्दी तर होत नाही ना आणि व्यवस्थित सोशल डिस्टनसिंग पाळले जात आहे की नाही, त्याचीही आम्ही क्षणाक्षणाला माहिती मिळवत राहू. स्मार्ट कंट्रोल रूममध्ये बसलेले तंत्रज्ञ या ड्रोन ला नियंत्रित करतील आणि त्याच्या इमेजवर लक्ष ठेवतील. विशेष उल्लेखनीय असे की, नागपुरातील कोरोनाचा प्रादुर्भाव रोखण्यासाठी शहर पोलीस ड्रोनचा वापर करणार असल्याची बातमी लोकमत'ने काही दिवसांपूर्वी दिली होती, त्या बातमीवर आता शिक्कामोर्तब झाले आहे.