भांडण सोडविण्यासाठी धावलेल्या मुलीवर पित्याचा चाकू हल्ला; गुन्हा दाखल

आरडाओरड ऐकून बाजूची मंडळी धावली, त्यांनी आरोपीला आवरले.

ठळक मुद्देमुलगी जबर जखमी : कपिल नगरातील घटना

नागपूर : आईशी भांडण करणाऱ्या वडिलाला समजाविण्यासाठी गेलेल्या तरुण मुलीवर आरोपी पित्याने चाकू हल्ला केला. यात ती गंभीर जखमी झाली. कपिल नगर पोलीस ठाण्याच्या हद्दीत शुक्रवारी रात्री ही घटना घडली. मानसी शालीकराम बावणे (वय २३) असे जखमी मुलीचे नाव आहे.

कपिल नगर पोलीस ठाण्याच्या हद्दीत तारखेश्वर नगर आहे. येथे राहणारा आरोपी शालिकराम सोमाजी बावणे (५०) हा शुक्रवारी रात्री दहाच्या सुमारास त्याच्या पत्नीसोबत वाद घालत होता. दारूच्या नशेत शालिकराम त्याच्या पत्नीला नाहक शिवीगाळ करत असल्यामुळे मुलगी मानसी मध्ये पडली. तिने वडिलांना समजावून शांत करण्याचा प्रयत्न केला. मात्र, रागाच्या भरात बेभान झालेल्या आरोपी शालिकरामने मानसीला मारहाण केली. एवढेच नव्हे, तर तिच्या पाठीवर चाकूने हल्ला चढवून तिला जबर जखमी केले.

आरडाओरड ऐकून बाजूची मंडळी धावली, त्यांनी आरोपीला आवरले. त्यानंतर जखमी मानसीवर उपचार करण्यात आले. दरम्यान, मिळालेल्या सूचनेनुसार कपिलनगर पोलिसांनी घटनास्थळ गाठले. मानसीची तक्रार नोंदवून आरोपी शालिकराम बावणे विरुद्ध विविध कलमांनुसार गुन्हा दाखल करण्यात आला. पुढील तपास सुरू आहे.