भाजपच्या अल्पसंख्यांक मोर्चाच्या राष्ट्रीय अध्यक्षांना जीवे मारण्याची धमकी

Nagpur News भाजपच्या अल्पसंख्यांक मोर्चाचे राष्ट्रीय अध्यक्ष जमाल सिद्दीकी यांना जीवे मारण्याची धमकी देण्यात आली आहे.

नागपूर : भाजपच्या अल्पसंख्यांक मोर्चाचे राष्ट्रीय अध्यक्ष जमाल सिद्दीकी यांना जीवे मारण्याची धमकी देण्यात आली आहे. त्यांच्या कार्यालयात धमकी देणारे पत्र पाठविण्यात आले आहे. यासंदर्भात सिद्दीकी यांनी पोलिसांत तक्रार दाखल केली आहे.

जमाल सिद्दीकी जुलै महिन्यात राष्ट्रीय स्वयंसेवक संघाच्या गुरुपूजन कार्यक्रमात सहभागी झाले होते. त्यानंतर त्यांना अनेकदा धमक्यांचे फोन आले. त्यांचे कार्यालय काही दिवसांपासून बंद होते. गुरुवारी त्यांच्या कार्यालयात पत्र निनावी पत्र आले. त्यात त्यांना जीवे मारण्याची धमकी देण्यात आली. शिवाय संघाच्या कार्यक्रमात ते उपस्थित असल्याचे फोटोदेखील पत्राला जोडण्यात आले होते. सिद्दीकी यांना यासंदर्भात विचारणा करण्यात आली असता त्यांनी याला दुजोरा दिला. मागील काही दिवसांपासून धमक्या देण्याचे प्रकार वाढले आहेत. परंतु पहिल्यांदाच पत्राद्वारे धमकी देण्यात आली आहे. यासंदर्भात मी सक्करदरा पोलीस ठाण्यात तक्रार दाखल केली आहे, असे त्यांनी सांगितले. पोलिसांनी रात्रीपर्यंत या प्रकरणात गुन्हा दाखल केला नव्हता.