लहान मुलांमध्ये दाताचे आजार वाढत आहेत!

- चॉकलेट खाणे घातकच : हिरड्यांच्या वेदना, मधुमेहास ठरतेय कारणीभूत

लोकमत न्यूज नेटवर्क

नागपूर : टेस्टी टेस्टी चॉकलेट प्रत्येक वयोगटाला आकर्षित करतात. जणू चॉकलेट फस्त करण्याची स्पर्धाच लागली आहे. विविध ब्रॅण्ड्सनेही पसंतीला अनुरुप आकर्षित करणाऱ्या वेस्टनाने नागरिकांना भुरळ पाडण्यास सुरुवात केली आहे. दररोज टीव्हीवर झळकणाऱ्या जाहिरातींनी तर ग्राहक आपसूकच चॉकलेटकडे वळतो आहे. एवढेच नव्हे तर सणासुदीला घरी बनणाऱ्या मिष्ठान्नांची जागाही हे चॉकलेट्स घेत आहेत; मात्र हे चॉकलेट्स आरोग्यासाठी घातक आहेत, याकडे दुर्लक्ष होत आहे. लहान मुलांमध्ये तर लहानपणापासूनच चेहऱ्याच्या सौंदर्यात अत्याधिक महत्त्वाचा भाग असलेल्या दातांचे आजार वाढत असल्याचे दिसून येते.

चॉकलेट्स न खाल्लेलेच बरे

चॉकलेट कमी किंवा जास्त खाण्याचा प्रश्नच उद्भवत नाही. चॉकलेटमध्ये असलेल्या चिकटपणामुळे ते दातावर बराच वेळ चिकटलेले असतात आणि मग त्याचे ॲसिडमध्ये रुपांतरण होते. हे ॲसिड हळूहळू दात पोखरतात. त्याला आपण कीड लागल्याचे संबोधतो.

इनॅमल स्ट्रक्चर निघून जाते

दातावर असलेले इनॅमल स्ट्रक्चर चॉकलेट्स दातांना चिकटल्यामुळे नष्ट होते. हे इनॅमल स्ट्रक्चर दाताचे संरक्षक कवच म्हणून काम करते. संरक्षक कवचच नष्ट झाल्यावर कीड लागण्यासारख्या परिणामांना पुढे जावे लागते. लहान मुलांना तर अधिकच त्रास होतो.

कीड लागलेले दात सौंदर्याला बाधक

मोत्यांसारखे दात असावे, असे प्रत्येकाचे स्वप्न असते. लहान मुलांचे हास्य दातांमुळेच अधिक शोभून दिसते; मात्र लहान मुले चॉकलेटला जास्त भूलतात आणि ते अधिक खाण्याचा प्रयत्न करतात. त्यामुळे त्यांचे दात किडणे, खराब होणे किंवा झिजणे असे प्रकार घडतात. ते दिसायला कुरूप दिसतात.

ब्रश करणे किंवा चूळ भरणे

चॉकलेट खाल्ल्यावर लगेच ब्रश करणे किंवा चूळ भरणे गरजेचे आहे. माऊथ वॉश केले तर ते आणखीनच चांगले. त्यामुळे अन्य विषाणूही मरतात.

टिथ फिलिंग, रूट कॅनल, दात बदलणे

कीड लागली की खराब झालेले दात टिथ फिलिंगने भरून काढावे लागते. फार आतपर्यंत कीड गेली असेल तर रुट कॅनल करण्याशिवाय पर्याय नसतो आणि दात पूर्णच खराब झाले तर ते काढून नकली दात बसवावे लागतात. चॉकलेट खाल्ल्याने आपले ओरिजनल दात गमवावे लागून नकली दात बसवणे, हे त्रासदायकच ठरते.

चॉकलेट खाणे निश्चितच चांगले नाही. दात खराब होण्यासोबतच मधुमेह होण्यास कारणीभूत ठरते. चॉकलेटमध्ये साखरेचे प्रमाण सर्वाधिक असते आणि केमिकल्सही असतात. प्रारंभी त्यांचा परिणाम जाणवत नाही; मात्र कालांतराने तुम्ही आजाराला आमंत्रित केले आहे, हे त्यानंतर जाणवणाऱ्या लक्षणांनी स्पष्ट होते. हिरडे खराब झाले तर बोबडे होण्याची शक्यताही जास्त असते.

- डॉ. रामकृष्ण शेणॉय, दंतराेग विशेषज्ज्ञ

......................