धीरेंद्र जैन यांचे निधन ()

जयपूर : लोकमत समाचारचे जयपूर ब्यूरो चीफ धीरेंद्र जैन यांचे सोमवारी रात्री निधन झाले. ते ८२ वर्षांचे होते. कोरोना उपचार सुरू असताना त्यांना हृदयविकाराचा धक्का आला. त्यांच्या पत्नी कमलेश यांनाही कोरोना झाला आहे.

जैन राजस्थानमधील ज्येष्ठ पत्रकार होते. त्यांना सामाजिक प्रश्नांवरील लिखाणात रुची होती. लोकमत ग्रुपचे संस्थापक-संपादक आणि स्वातंत्र्य संग्राम सेनानी जवाहरलाल दर्डा ‘बाबूजी'' यांच्या स्मृतिप्रीत्यर्थ दरवर्षी राजस्थानमधील पत्रकारांना दिल्या जाणाऱ्या पत्रकारिता पुरस्कार समितीचे ते सचिव होते. त्यांच्या पार्थिवावर आदर्शनगर मोक्षधाम येथे अंत्यसंस्कार करण्यात आले.

राजस्थानचे मुख्यमंत्री अशोक गहलोत यांनी अत्यंत व्यस्त असतानाही जैन यांची तब्येत बरी होण्यासाठी प्रयत्न केले. जैन हे कर्तव्यनिष्ठ पत्रकार होते. त्यांच्या निधनामुळे पत्रकारितेचे मोठे नुकसान झाले, अशी प्रतिक्रिया गहलोत यांनी व्यक्त केली. लोकमत ग्रुपच्या एडिटोरियल बोर्डचे चेअरमन विजय दर्डा म्हणाले की, धीरेंद्र जैन यांनी नेहमी सामान्य व्यक्तींकरिता लिखाण केले. त्यांना लोकमत परिवाराच्या वतीने विनम्र आदरांजली.