राज्यात कुठूनही करा डायल ११२; लगेच मिळणार पोलिसांची मदत !

Nagpur News तुम्ही राज्याच्या कोणत्याही गाव, शहरात असा. अडचणीत असाल तर घाबरू नका ! तातडीने ११२ डायल करा. १० ते १२ मिनिटात पोलीस तुमच्यापर्यंत पोहोचतील आणि तुम्हाला अडचणीतून बाहेर काढतील.

ठळक मुद्देपोलिसांच्या डायल ११२ ची सुरू आहे ट्रायल

नरेश डोंगरे

लोकमत न्यूज नेटवर्क

नागपूर : तुम्ही राज्याच्या कोणत्याही गाव, शहरात असा. अडचणीत असाल तर घाबरू नका ! तातडीने ११२ डायल करा. १० ते १२ मिनिटात पोलीस तुमच्यापर्यंत पोहोचतील आणि तुम्हाला अडचणीतून बाहेर काढतील. होय, राज्य पोलीस दलाच्या डायल ११२ च्या माध्यमातून हे आता शक्य होणार आहे. (Dial 112 from anywhere in the state; Get police help right away!)

 

अडचणीतील नागरिकांच्या मदतीसाठी अद्ययावत अशी डायल ११२ सुविधावजा उपक्रम राज्य पोलीस दलाने कार्यान्वित केला आहे. नागपूर शहर आणि जिल्ह्यातही लवकरच तो सुरू होणार आहे. त्याची ट्रायल सुरू आहे.

चोरी, घरफोडी, खून, बलात्कार, अपघात, हाणामारी, लुटमार अथवा कोणताही गुन्हा घडला की सर्वप्रथम पीडिताला पोलिसांची आठवण येते. पोलीस मदतीला पोहोचतातही. मात्र, उशिराने! कारण घटनास्थळ शोधण्यात त्यांचा बराच वेळ जातो. त्यामुळे सगळे संपल्यावर पोलीस येतात, अशी टीका पोलिसांवर नेहमी केली जाते. त्यातूनच अडचणीतील व्यक्तीला तात्काळ मदत मिळत नसल्याची ओरड होते. ते लक्षात घेऊन राज्य शासनाने अडचणीतील व्यक्तीच्या मदतीसाठी पोलीस तात्काळ घटनास्थळी कसे पोहोचतील, यासंबंधाने अभ्यासपूर्ण नियोजन केले.

त्यातून डायल ११२ ही उपक्रमवजा सुविधा अत्याधुनिक यंत्रणासह नागरिकांच्या मदतीसाठी कार्यन्वित केली. नागपूर शहर आणि जिल्ह्यासह राज्यातील सर्वच जिल्ह्यात ती लवकरच सुरू होणार आहे. त्यामुळे कुठेही, कुणीही अडचणीत असेल आणि त्याने ११२ डायल केले तर ‘सिंघम’च्या रूपातील पोलीस त्याच्या मदतीला अवघ्या १० ते १२ मिनिटात पोहोचतील. या उपक्रमामुळे गुन्हेगारी नियंत्रण आणि कायदा व सुव्यवस्थेची घडी नीट राखण्यातही पोलिसांना मदत होणार आहे.

 

तात्काळ कळेल लोकेशन

वर्षभरापूर्वीच या उपक्रमाचे मुख्य केंद्र मुंबई आणि नागपुरात सुरू करण्याच्या हालचाली सुरू झाल्या. राज्यातील कोणत्याही ठिकाणाहून ११२ वर कुणी फोन केला तर त्याचे लोकेशन या दोन केंद्रात कार्यरत अधिकारी-कर्मचाऱ्यांना कळेल. त्यामुळे येथील मंडळी त्या त्या ठिकाणच्या पोलिसांना तात्काळ निरोप देतील आणि पोलीस तेथे पोहोचले की नाही, त्याचा मागोवाही घेता येईल

 

३४० कर्मचारी नियुक्त

नागपूर जिल्ह्यात २२ पोलीस स्टेशन आहेत. या उपक्रमासाठी दोन अधिकारी (सुपरवायझर) आणि ३४० कर्मचारी निवडण्यात आले असून, अडचणीत असलेल्या व्यक्तीची तात्काळ मदत कशी करायची, त्याचे प्रशिक्षण त्यांना दिले जात आहे.

 

नवीन वाहने मिळाली

या उपक्रमांतर्गत पोलिसांना नवीन १९ वाहने मिळाली आहेत. आणखी काही वाहनांची गरज आहे. उपलब्ध वाहनांची आणि उपकरणांची ट्रायल सुरू आहे. लवकरच हा उपक्रम जिल्ह्यात सुरू होणार आहे.

राहुल माकणीकर

अतिरिक्त पोलीस अधीक्षक, नागपूर

------