नात्याला काळिमा! प्रियकराचा प्रेयसीवर तर आजोबाचा नातीवर बलात्कार

Nagpur News एका प्रियकराने १२ वर्षांच्या प्रेयसीवर आणि कपिलनगर ठाण्याच्या परिसरात ६२ वर्षाच्या आजोबानेच आपल्या नातीलाच वासनेची शिकार बनविल्याची खळबळजनक घटना घडली आहे.

ठळक मुद्देजरीपटका, कपिलनगर ठाण्यांतर्गत दोन अल्पवयीन मुलींवर अत्याचार

नागपूर : शहरात जरीपटका परिसरात एका प्रियकराने १२ वर्षांच्या प्रेयसीवर आणि कपिलनगर ठाण्याच्या परिसरात ६२ वर्षाच्या आजोबानेच आपल्या नातीलाच वासनेची शिकार बनविल्याची खळबळजनक घटना घडली आहे. दोन्ही घटनांमुळे परिसरात खळबळ उडाली आहे.

पोलिसांनी दिलेल्या माहितीनुसार, पहिल्या घटनेत जरीपटका परिसरात आरोपी मनीष नरेश लिंबाडे (२४) याची त्याच्याच वस्तीत राहणाऱ्या १२ वर्षाच्या अल्पवयीन मुलीसोबत मैत्री होती. दोघेही व्हॉट्सॲपवर चॅटिंग करीत होते. आरोपी मनीष एका शासकीय कार्यालयात कंत्राटी कर्मचारी आहे. अल्पवयीनने दिलेल्या तक्रारीनुसार २४ एप्रिलला रात्री १२ वाजता मनीषने तिला आपल्या घरी बोलावले होते. ती त्याच्या घरी गेल्यानंतर मनीषने तिच्याशी जबरदस्ती शारीरिक संबंध प्रस्थापित केले. त्यानंतर कुणाला काही सांगितल्यास तिला जीवे मारण्याची धमकी दिली. परंतु रविवारी अल्पवयीन मुलीने आपल्यासोबत घडलेल्या घटनेची माहिती आपल्या आई-वडिलांना आणि आजीला दिली. त्यानंतर कुटुंबीय अल्पवयीन मुलीला घेऊन जरीपटका ठाण्यात पोहोचले. जरीपटका पोलिसांनी आरोपी मनीषविरुद्ध कलम ३७६ आणि पोक्सोनुसार गुन्हा दाखल करून सोमवारी पहाटे ३ वाजता त्याला अटक केली.

दुसऱ्या घटनेत कपिलनगर ठाण्यांतर्गत आजोबाच आपल्या १३ वर्षांच्या नातीसोबत शारीरिक संबंध करीत असल्याचे उघडकीस आले आहे. पीडित मुलीची आई गर्भवती असल्यामुळे आपल्या वडिलांच्या घरी एप्रिल २०२१ मध्ये प्रसूतीसाठी आली होती. गर्भवती असल्यामुळे तिची आई आपल्या मुलीला आजोबांजवळ झोपण्यासाठी पाठवीत होती. काही दिवसापूर्वी आईने मुलीला वडिलांसोबत आपत्तीजनक स्थितीत पाहिले. त्यानंतर तिने मुलीला विश्वासात घेऊन चौकशी केली. अल्पवयीन मुलीने घडलेला प्रकार सांगितल्यानंतर तिच्या आईने कुटुंबीयांशी चर्चा केली. परंतु त्यांनी बदनामीच्या भीतीने शांत राहण्याचा सल्ला देऊन चुप्पी साधली. परंतु पीडित मुलीच्या आईने हिंमत दाखवून कपिलनगर ठाण्याचे निरीक्षक अमोल देशमुख यांना घटनेची माहिती दिली. मुलीच्या तक्रारीवरून पोलिसांनी आरोपीविरुद्ध बलात्कार व पोक्सोनुसार गुन्हा दाखल करून त्यास अटक केली आहे.

युवतीला पळवून नेण्याची धमकी

यशोधरानगर ठाण्यांतर्गत राहत असलेल्या १८ वर्षाच्या युवतीला पळवून नेण्याची धमकी दिल्याची घटना घडली आहे. या घटनेत पोलिसांनी आरोपीचे नाव उघड केलेले नाही. पहिला फोन युवतीला ३१ मे मंगळवारी सायंकाळी ६ वाजता आला होता. त्यानंतर तिच्या मामाने फोन उचलला असता, आरोपीने त्यांच्या भाचीला पळवून नेण्याची धमकी दिली. तुम्ही आमच्या मध्ये पडू नका, असे सांगून आरोपीने आपला फोन बंद केला. मुलीच्या तक्रारीवरून यशोधरानगर पोलिसांनी आरोपीविरुद्ध छेडखानी व धमकी दिल्याचा गुन्हा दाखल केला आहे.

...............