पाणी पिताय ना; मग काळजी घ्या !

नागपूर : पावसाळ्यात होणारे सर्वाधिक आजार हे दूषित पाण्यामुळे होतात. त्यामुळे पावसाळ्यात आरोग्य टिकवून ठेवायचे असेल तर पाणी पिताना काळजी घेतलेलीच बरी.

- दूषित पाण्यामुळे होणारे आजार

उलटी, टायफाईड, कॉलरा, गॅस्ट्रो, व्हायरल, इन्फेक्शन, काविळ

- अशा प्रकारे घ्यावी काळजी

पाण्याची भांडी दररोज स्वच्छ धुवून त्यात पाणी भरावे.

पिण्याचे पाणी हे नेहमी गाळून व उकळून प्यावे.

पाण्यामध्ये मेडिक्लोरचे काही थेंब टाकावे.

बाहेरील पाणीपुरी, भेळ अथवा इतर पदार्थ खाणे टाळावे.

नागरिकांनी पावसाळ्यात एवढी खबरदारी घेतल्यास अनेक आजार दूर राहू शकतात, असे तज्ज्ञांचे म्हणणे आहे.

- आजारांची लक्षणे

१) गॅस्ट्रो या आजारात रुग्णाला उलटी, जुलाब होतात. दूषित पाणी पिल्यानंतर चार ते पाच तासात ही लक्षणे दिसू लागतात.

२) टायफाईड दूषित पाण्यामुळे होतो. रुग्णाला ताप येतो. पोटात दुखते, उपचार न घेतल्यास जंतू रक्तात मिसळतात.

३) उलट्या, ताप, लघवी पिवळी होणे, भूक न लागणे ही काविळची लक्षणे आहेत. डोळे पिवळे दिसायला लागतात. महिना ते दीड महिना आजाराची लक्षणे कायम राहतात.

- नागपूरला प्रतिव्यक्ती मिळते दीडशे लिटर पाणी

नागपूर शहरातील २७ लाख लोकसंख्येला दररोज ६५० एमएलडी पाणी पुरवठा केला जातो. पाणी पुरवठ्याच्या मानकानुसार प्रति व्यक्तीला दररोज १५० लिटर पाणी महापालिका देते. नागपूर शहराला पेंच व कन्हान प्रकल्पातून पाणी पुरवठा होतो.