सासरच्या जाचाला कंटाळून डॉक्टरची आत्महत्या; भुलीच्या इंजेक्शनचा ओव्हरडोस घेऊन दिला जीव

सासरच्या छळाला कंटाळून डॉक्टरने भूल देणाऱ्या इंजेक्शनचा ओव्हरडोस घेत आत्महत्या केल्याची घटना समोर आली आहे.

ठळक मुद्देखिशात आढळली सुसाईड नोट

 नागपूर :

 सेंट्रल एव्हेन्यूवरील एका खासगी ईस्पितळात सेवारत असलेल्या एका डॉक्टरने स्वतःला विशिष्ट प्रकारचे इंजेक्शन टोचून घेत आत्महत्या केली. शुक्रवारी भल्या सकाळी ही घटना उघकीस आल्यानंतर शहरातील वैद्यकीय वर्तुळात प्रचंड खळबळ उडाली आहे.

डॉ. अभिजीत रत्नाकर धामनकर (वय ३९) असे मृत डॉक्टरचे नाव आहे. ते राऊत चाैक लालगंजमध्ये राहत होते. सेंट्रल एव्हेन्यूवरील किमया हॉस्पिटलमध्ये ते सेवारत होते. पहिल्या पत्नीला घटस्फोट दिल्याने त्यांनी २०१७ मध्ये विशाखा गायकवाड यांच्याशी लग्न केले होते. त्यांना एक वर्षांचा मुलगा असल्याचे समजते. सासरच्यांची ढवळाढवळ वाढल्याने त्यांच्या घरातील वातावरण बिघडले होते. परिणामी घरगुती वादामुळे त्यांची पत्नी माहेरी निघून गेली. त्यामुळे ते काही दिवसांपासून अस्वस्थ होते.

गुरुवारी त्यांची नाईट ड्युटी होती. नेहमीप्रमाणे रात्री १० वाजता ते कर्तव्यावर आले. भरती असलेल्या रुग्णांची तपासणी करून पहाटेच्या वेळी ते आपल्या रूममध्ये आराम करण्यासाठी निघून गेले. एका रुग्णाची प्रकृती बिघडल्याने पहाटे ३ च्या सुमारास ईस्पितळातील नर्सने त्यांना रूममध्ये जाऊन आवाज दिले. मात्र, त्यांनी प्रतिसाद दिला नाही. त्यामुळे नर्सने जवळ जाऊन बघितले. त्यांचा श्वासोश्वास आणि नाडी बंद पडल्यासारखी जाणवल्याने नर्सने ईस्पितळाच्या संचालकांसह अन्य डॉक्टरांना फोन करून बोलवून घेतले. त्यांनी डॉ. अभिजीत यांना व्हेंटिलेटरवर ठेवून सुमारे तासभर कृत्रीम श्वास देण्याचा प्रयत्न केला. दरम्यान, पोलीस आणि डॉ. अभिजीत यांच्या नातेवाईकांना बोलवून घेण्यात आले. पहाटे ५ च्या सुमारास डॉ.अभिजीत यांना त्यांच्या सहकारी डॉक्टरांनी मृत घोषित केले.

खिशात आढळली सुसाईड नोट

पोलिसांनी डॉ. अभिजीत यांच्या कपड्याची तपासणी केली. त्यांच्या खिशात एक नोट आढळली. त्यात त्यांनी आत्महत्या करीत असल्याचे स्पष्ट केले. सीमा गायकवाड, विनय गायकवाड, राहुल लोखंडे आणि तांबेबाई यांच्याकडून होणाऱ्या त्रासामुळेच आत्महत्या करीत असल्याचे नमूद केले आहे. गणेशपेठ पोलिसांनी डॉ. अभिजीत यांच्या मृत्यूप्रकरणी अकस्मात मृत्यूची नोंद केली. संबंधितांची चाैकशी करून गुन्हा दाखल करण्यात येईल, अशी माहिती गणेशपेठचे ठाणेदार भारत क्षीरसागर यांनी लोकमतला दिली.