एसीबीचा डबल धमाका

लोकमत न्यूज नेटवर्क

नागपूर - एसीबीच्या पथकाने मंगळवारी कारवाईचा डबल धमाका केला. एकीकडे महापालिकेच्या वरिष्ठ लिपिकाला लाच घेताना रंगेहाथ पकडून त्याच्या मुसक्या आवळल्या तर, दुसरीकडे वाहतूक शाखेच्या पोलिसाला लाच मागण्याच्या आरोपाखाली जेरबंद केले. एकाच दिवशी दोघांच्या विकेट घेतल्याने लाचखोरात चांगलीच खळबळ उडाली आहे.

महापालिकेत सफाई कर्मचारी असलेले पीडित ३१ मार्चला निवृत्त झाले. निवृत्तीनंतर त्यांची पत्नी पतीचे निवृत्ती वेतन आणि इतर हक्काचे लाभ मिळावे म्हणून धरमपेठ झोनचे आरोग्य विभागातील वरिष्ठ लिपिक राजेंद्र शंकरराव गजभिये (वय ५५) यांच्याकडे चकरा मारू लागली. निवृत्ती वेतनासोबतच शिल्लक सुट्यांचे पैसे वाढवून देण्याची बतावणी करून गजभियेने या महिलेला ३ जून रोजी १० हजाराची मागणी केली. महिलेचे पती (निवृत्त कर्मचारी) आजारामुळे अंथरुणाला खिळले आहे. तर, सदर महिला नुकतीच कोरोनातून बरी झाल्याने त्यांची तीव्र आर्थिक कोंडी झाली आहे. १० हजाराची रक्कम खूप जास्त असल्याने महिला एसीबीत पोहचली. तिच्या तक्रारीवरून एसीबीच्या अधीक्षक रश्मी नांदेडकर आणि अतिरिक्त अधीक्षक मिलिंद तोतरे यांच्या मार्गदर्शनात मंगळवारी उपअधीक्षक योगिता चाफले यांच्या नेतृत्वात नायक रविकांत डहाट, अनमोल मनघरे, आँचल हरगुळे, अस्मिता मेश्राम आणि प्रिया नेवरे यांनी दुपारी ४ वाजता गजभियेला लाचेचे १० हजार रुपये स्वीकारताच रंगेहाथ पकडले.

---

‘ऑन डिमांड विकेट’

दुसरी कारवाई प्रतापनगर पोलीस ठाण्याच्या हद्दीत घडली. तक्रारदाराच्या ऑटोला १० मे रोजी शंकरनगर चाैकाजवळ एका ॲम्ब्युलन्सची धडक बसली होती. त्यावेळी पोलीस शिपाई बिपीन शंकरराव महाजन (वय ३२) याने ऑटोचालकाला ५०० रुपयाची लाच दे अन्यथा तुझा ऑटो चेंबरला लावून २ हजाराच्या दंडाची कारवाई करेन, अशी धमकी दिली होती. तो लाचेसाठी कारवाईची सारखी धमकी देत असल्याने आठ दिवसापूर्वी ऑटोचालकाने त्याच्याविरुद्ध एसीबीकडे तक्रार नोंदविली. एसीबीने कारवाईचा सापळा लावला. मात्र, संशय आल्यामुळे महाजन लाचेची रक्कम घेण्यास टाळाटाळ करू लागला. त्यामुळे एसीबीच्या अधीक्षक रश्मी नांदेडकर यांनी आरोपी महाजनविरुद्ध लाच मागण्याची (ऑन डिमांड) कारवाई करण्याचे आदेश दिले. त्यानुसार, मंगळवारी दुपारी उपअधीक्षक नरेश पार्वे यांच्या नेतृत्वात लक्ष्मण परतेती, भागवत वानखेडे, सचिन किन्हेकर आणि शारिक शेख यांनी लाचखोर महाजनला जेरबंद केले.

----