विजेची केबल नाही मिळाले, अंबाझरी पुलाचे काम अडकले

गेल्या वर्षी अंबाझरी ओव्हरफ्लो झाल्यामुळे परिसरात मोठा पूर आला होता.

नरेश डोंगरे, नागपूर : अंबाझरी ओव्हरफ्लोसमोर विवेकानंद स्मारकाजवळ असलेल्या नवीन पुलाचे काम अडकले आहे. शनिवारी विजेची लाइन शिफ्ट करून हा पूल तोडण्याचे काम सुरू केले जाणार होते. मात्र, परिश्रम घेऊनही पीडब्ल्यूडीला विजेचे केबल न मिळाल्यामुळे हे काम आता रेंगाळले आहे. गेल्या वर्षी अंबाझरी ओव्हरफ्लो झाल्यामुळे परिसरात मोठा पूर आला होता. त्याची पुनरावृत्ती होऊ नये म्हणून नवीन पूल बांधण्याचा निर्णय घेण्यात आला. 

या महिन्यात जुना पूल तोडण्याचे काम सुरू झाले. तिकडे महावितरणच्या ३३ केव्ही हिंगणा शंकरनगरची लाइन क्षतिग्रस्त झाली. परिणामी पीडब्ल्यूडी आणि महावितरणमध्ये वाद झाल्याने १५ मेपासून पूल तोडण्याचे काम बंद झाले. पुलाच्या कामातील अडथळा दूर करण्यासाठी जिल्हाधिकारी डॉ. विपीन ईटनकर यांनी दोन्ही विभागातील अधिकाऱ्यांना समन्वयाने काम करण्याचे निर्देश दिले. त्यानंतर लाइन शिफ्टिंगचे काम पीडब्ल्यूडीचा इलेक्ट्रिकल विभाग महावितरणच्या मार्गदर्शनात काम करेल, असे ठरले. त्यानुसार शनिवारी लाइन शिफ्ट केली जाणार होती. मात्र, पीडब्ल्यूडीला केवळ तीनच केबल मिळाले. दोन अजून मिळायचे असल्याने शिफ्टिंगच्या कामाला ब्रेक लागला आहे.
---------------

१५ ऑगस्टपर्यंत नवीन पूल; एक महिना वाहतूक बंद
दरम्यान, पीडब्ल्यूडीच्या दाव्यानुसार, १५ ऑगस्टपर्यंत नवीन पुलाचे काम पूर्ण होईल. केबल शिफ्ट झाल्यानंतर शिल्लक पूल तोडण्याचे काम सुरू होईल. त्यामुळे १५ जुलैपासून वाहतूक बंद करून पुलाचे काम पूर्ण केले जाणार आहे. तिकडे महावितरण म्हणते की, वीजपुरवठा प्रभावित होऊ नये म्हणून लाइन शिफ्टिंगचे काम लवकरच पूर्ण केले जाईल.

--------------                                                                                                                                                                          डिझाइन कुण्या कामाची

पुलाखालून महावितरणची लाइन कुठून गेली त्याचा पत्ता लागलेला नाही. महावितरणकडे असलेली डिझाइनसुद्धा उपयोगी पडू पाहत नाही. कंपनीच्या म्हणण्यानुसार, सुमारे २० वर्षांपूर्वीचे डिझाइन आहे. केबलवर अनेकदा काँक्रीट टाकण्यात आल्याने ही लाइन कुठून गेली, ते कळेनासे झाले आहे.